त्रिकोणात्मक टी–ट्वान्टी सिरिज आजबाट सुरु, पहिलो खेलमा नेपाल पीएनजीविरुद्भ खेल्दै

नेपाल, पपुवा न्यगिनी पीएनजी र मलेसिया सम्मिलित त्रिकोणत्मक टी–ट्वान्टी सिरिज आज काठमाडौंमा शुरु हुँदैछ।

सिरिजको पहिलो खेलमा नेपालले पपुवा न्यगिनी पीएनजीसँग दिउँसो साढे १२ बजे त्रिवि क्रिकेट मैदानमा खेल्नेछ। टी–ट्वान्टी अन्तर्राष्ट्रियमा नेपाल र पीएनजीबीच १ पटक मात्र खेल भएको छ। आईसिसी टी–ट्वान्टी विश्वकप छनोट अन्तर्गत पीएनजीसँग सन् २०१५ मा भएको खेलमा नेपाल ८ विकेटले पराजित भएको थियो।

७ वर्षपछि टी–ट्वान्टी खेल्न लाग्दा त्यस समय टोलीमा रहेका करण केसी र सोमपाल कामी मात्र यस पटक पनि पीएनजीविरुद्ध खेल्दैछन। सिरिजको आफ्नो दोस्रो खेलमा नेपालले मलेसियासँग खेल्नेछ। मलेसियासँग अहिलेसम्म ६ खेल खेल्दा नेपालले ५ जित र १ हारको नतिजा निकालेको छ।

यस सिरिजका ३ टोली मध्ये आईसिसीको वरियताका आधारमा नेपाल बलियो देखिएको छ। पछिल्लो वरियतामा नेपाल १३ औं स्थानमा रहँदा पीएनजी १९ र मलेसिया ३३ औं स्थानमा छ।

घरेलु मैदानमा भएका टी–ट्वान्टी खेलमा राम्रो नतिजा निकालेको नेपालले यस सिरिजमा नयाँ खेलाडीलाई प्रयोग गर्ने लक्ष्य लिएको छ।

त्रिवि मैदानमा ८ टी–ट्वान्टी खेल्दा नेपालले ७ खेल जितेको छ । डबल राउण्ड रोबिनको आधारमा हुने सिरिज ३ वटै टोलीले २-२ खेल खेलेपछि अंक तालिकाको शीर्ष दुई टोलीबीच फाइनल खेल हुनेछ ।