दरै समाज तनहुँको आयोजनामा तनहुँको व्यास नगरपालिका–३ बिपी वनबाटिका खेल मैदानमा यही माघ १५ गतेदेखि प्रथम ‘राष्ट्रिय दरै कप–२०८०’ सेभेन ए साइड फुटबल प्रतियोगिता सञ्चालन भइरहेको छ । प्रतियोगिताको आज फाइनल खेल हुँदैछ ।

प्रतियोगिता सुरु भएसँगै व्यास–१० दुम्सीका मानबहादुर दरै फुटबल हेर्नका लागि दैनिकरुपमा दमौली आउँछन् । उनले भने, ‘काम विशेषले मात्रै दमौली आउने गरिन्थ्यो । अहिले लगातार आइरहेको छु । खेलकुदले समुदायलाई एकत्रित बनाएको छ । समुदायका खेलाडी यति धेरै रहेछन् । हामीलाई भने थाहै थिएन् । यी खेलाडीलाई राष्ट्रियस्तरसम्म पु¥याउन सक्नुपर्छ ।’

खेलकुदले समुदायका खेलाडी र युवालाई चिनाउन एउटा पुलको रुपमा काम गरिरहेको मानबहादुरले बताए । उनले भने, ‘समयसमयमा खेलकुद तथा विभिन्न कार्यक्रम हुनुपर्ने रहेछ । यसले एक अर्कामा परिचित गराउँछ । खेलकुद मात्रै नभई अन्य रचनात्मक कार्यक्रम गर्न आवश्यक देखिएको छ ।’ समुदायबीच एकता कायम गर्न खेलकुदले महत्वपूर्ण भूमिका खेलेको मानबहादुरको भनाइ थियो । समुदायका सबै ठाउँका मानिस अहिले यहीँ आएको देखेर आफू पनि फुटबल हेर्न अरु काम छाडेर आइरहेको उनले बताए ।

व्यास–१ का विष्णुबहादुर दरै खेलकुद हेर्न दैनिकरुपमा खेल मैदान पुग्छन् । खेलकुदले समुदायका सबैलाई एक ठाउँमा बनाएको उनले बताए । उनले भने, ‘खेलकुद भएपछि त समुदाय नै एक ठाउँमा जम्मा भएका छौँ । अरु काम त पछि पनि गर्न सकिन्छ । यो एक भएर खेलेको समय फेरि आउँछ कि आउँदैन, त्यसैले दैनिक यहाँ आउने गरेको छु । आज जान्न भने पनि आवतजावत हुन्छ । अनि निस्किन्छु ।’

विष्णुबहादुरका अनुसार पहिलेदेखि नै फुटबल खेल्न दौडने युवा अहिले विदेशमा छन् । तिनलाई फर्काएर खेलसँगै यहीँ केही गर्न प्रोत्साहन गराउन आवश्यक देखिएको उनको भनाइ थियो । ‘आमाबुवाले खेलमा जिन्दगी फाल्यो भनेको देखेका थियौँ, यसले एक ठाउँ बनाएको देखेर खेलकुदमा छोराछोरी, युवालाई लाग्न सहयोग र अवसर दिनुपर्छ’, उनले भने ।

व्यास–५ चिन्टुटारका तुलबहादुर दरै उनीहरु जस्तै दैनिकरुपमा प्रतियोगिता हेर्न आउँछन् । उनले भने, ‘युवालाई हौसला दिन पनि यहाँ उपस्थित हुनुपर्छ भनेर दिनदिनै आउँछु । अब समाजले खेलकुदमा लागेका युवालाई राष्ट्रियस्तरका खेलकुदमा सहभागी बनाउने बाटो खोजी गर्नुपर्छ । यही विषयमा नेतृत्वसँग समन्वय गर्ने योजना बनाएको छु ।’ विशेष गरी खेलकुदसँगै अन्य सचेतनात्मक कार्यक्रम गरी समुदायलाई सशक्त बनाउनुपर्ने देखिएको तुलबहादुरले बताए ।

अल्पसंख्यक जाति दरै (दराई) लाई खेलकुदतर्फ प्रोत्साहन र अवसर सिर्जना गर्ने यो प्रतियोगिताले टेवा पु¥याएको समुदायका युवा तथा ज्येष्ठ नागरिकको बुझाइ छ । चितवनको भरतपुर महानगरपालिका–१५ स्थित दरै समाज मङ्गलपुरका समूह प्रमुख राजेश दराईले भने, ‘केही खेलाडीबीच परिचित भए पनि समुदायसँग चिनाउन पुलको भूमिका दरै समाज तनहुँले खेलेको छ । यहाँ खेलमा रुचि भएका खेलाडी रहेछन् । यसका लागि समाजले राम्रा खेलाडीलाई राष्ट्रियस्तर वा माथिल्लो तहसम्म पु¥याउने भूमिका खेल्नुपर्छ । प्रत्येक इकाइबाट उत्कृष्ट खेलाडी पहिचान गर्नुपर्छ ।’

समुदायलाई सङ्गठित बनाउन विभिन्न खालका रचनात्मक कार्यक्रम गरिरहनुपर्ने राजेशको सुझाव छ । तनहुँले यस वर्ष खेलकुद राख्यो भने अर्को वर्ष अर्को जिल्लामा खेलकुद वा अन्य कार्यक्रमको आयोजना हुनुपर्नेमा उनको जोड थियो । राजेशले भने, ‘दरै समुदायको मुलुकमा नै प्रवद्र्धन भएको छैन । समाजले खेलकुदसँगै जातिको पहिचानका लागि प्रचारप्रसार गर्नेगरी हाम्रा संस्कार, संस्कृतिको पनि प्रवर्द्धन गर्नुपर्छ ।’

दरै समाज नौरङ्गेका समूह प्रमुख सोमबहादुर दराईले भने, ‘प्रतिस्पर्धा मात्रै नभई सहभागिता महत्वपूर्ण छ । खेलकुदमा आउँदा दमौली घुम्न र लामो समयदेखि भेटघाट नभएका आफन्तसँग भेट्ने अवसर जु¥यो । अरु खेलहरु पनि छन् जस्तो कि भलिबल, टेबलटेनिस, क्रिकेट खेलाडी पनि छन् । ती खेलको प्रवद्र्धन र विकासका लागि अन्य खेलका कार्यक्रम पनि सञ्चालन गर्नुपर्छ ।’ खेलाडीलाई प्रोत्साहन गर्न समुदायमा सीमित नराखी एन्फाबाट सञ्चालन हुने सी डिभिजन, बि डिभिजन, ए डिभिजन लिगलगायत खेलमा यहाँका खेलाडीलाई अवसर दिनुपर्ने सोमबहादुरको भनाइ थियो । उत्कृष्ट खेलाडी छनोट गरी त्यस्ता प्रतिस्पर्धामा पुर्‍याउन समाजले भूमिका खेल्नुपर्ने उनले बताए ।

सोमबहादुरले भने, ‘हामी पिछडिएका जातिमा पर्छौं । शिक्षाका क्षेत्रमा पनि पछि परेका छौँ । शिक्षा, खेलकुदलगायत क्षेत्रमा सचेत गराउने गरी सचेतनात्मक कार्यक्रम गर्नुपर्छ ।’ यसतर्फ केन्द्रीय तथा जिल्ला र इकाइले योजना बनाएर अगाडि बढ्नुपर्ने उनले बताए । शैक्षिक सचेतना नै समुदायमा बढी आवश्यक रहेको सोमबहादुरको भनाइ थियो ।

धादिङका खेलाडी अमन दरैले जितभन्दा पनि समुदायमा सहभागिता जनाउनु महत्वपूर्ण भएको बताए । उनले भने, ‘यस खेलकुदमा सहभागिताले पहिचान जोडिएको छ । यसले हामीलाई गौरवान्वित बनाएको छ ।’ दरै समाज तनहुँका अध्यक्ष ठाकुरबहादुर दरैले खेलकुदका माध्यमबाट पिछडिएको दरै समुदायका खेलाडीलाई प्रोत्साहन गर्ने, मुलुकका विभिन्न जिल्लामा छरिएर रहेका दरै समुदायलाई एकता, सद्भाव र पारस्परिक मित्रभाव जगाउन भूमिका खेलेको बताए । उनले भने, ‘प्रतियोगिताले समुदाय तथा दरै जातिको पहिचानको प्रवर्द्धनमा टेवा पुग्नेछ ।’

अध्यक्ष ठाकुरबहादुरका अनुसार दुव्र्यसनी लागुऔषध फस्नसक्ने युवालाई खेलकुदतर्फ आकर्षित गर्न यो प्रतियोगिताले सहयोग पुगेको छ । यस प्रतियोगितामार्फत राष्ट्रिय तथा अन्तर–राष्ट्रिय खेलाडी उत्पादन गर्ने उद्देश्यका साथ गरिएकाले माथिल्लो तहसम्म खेल्ने अवसर कायम गर्न यसले महत्वपूर्ण भूमिका खेल्ने उनको भनाइ थियो ।

संविधानसभा सदस्य एवं प्रधानमन्त्री पुष्पकमल दाहालका प्रमुख स्वकीय सचिव सन्तकुमार दराईले खेलकुद मात्र नभई हरेक क्षेत्रमा दरै समुदायका युवालाई सक्रिय बनाउने खालका कार्यक्रम गर्न योजना बनाउनुपर्नेमा जोड दिए । उनले भने, ‘पिछडिएका जाति भनेर पछि हट्नेभन्दा पनि हरेक क्षेत्रमा समुदायलाई सक्रिय बनाउने गरी समाजले महत्वपूर्ण भूमिका खेल्नुपर्छ । विशेषगरी समुदायलाई शैक्षिक क्षेत्रमा सक्रिय बनाउनुपर्छ ।’ समाजले सचेतनात्मक कार्यक्रम गर्ने योजना बनाए सक्दो सहयोग गर्ने प्रतिबद्धता जनाउँदै उनले योजना बनाउन आग्रह गरे ।

नेपाल दरै उत्थान समाजका केन्द्रीय अध्यक्ष मङ्गलराम दराईले समुदायको पहिचानका लागि विभिन्न स्थानमा फैलिएर रहेका समुदायलाई एक हुने कार्यक्रमको ढाँचा बनाउने योजना तय भएको बताए । व्यास नगरपालिकाका उपप्रमुख इन्दिरा दरैले विभिन्न जिल्लामा छरिएर रहेका दरै समुदायलाई खेलकुदले एक बनाएको बताइन् । उनले भनिन्, ‘छरिएका यस समुदायलाई शैक्षिक सचेतना, स्वदेशमै रहने वातावरण बनाउने योजना र काम गर्ने वातावरण तयार पार्न नेतृत्वले भूमिका खेल्नुपर्छ । हाम्रो साथ र सहयोग रहनेछ ।’

आज सेमिफाइनल र फाइनल खेल हुँदैछन् । सेमिफाइनलको पहिलो खेलमा तनहुँको व्यास–१० स्थित दरै समाज दुम्सी इकाइ ‘ए’ र चितवनको दरै समाज मङ्गलपुर इकाइबीच प्रतिस्पर्धा हुनेछ । त्यस्तै दोस्रो खेलमा तनहुँको व्यास–४ दरै समाज साँखर इकाइ र आयोजक दरै समाज तनहुँबीच प्रतिस्पर्धा हुने सचिव विजय दरैले जानकारी दिए । उनका अनुसार आजै फाइनल खेल हुनेछ । प्रथम पुरस्कार रु एक लाख एक हजार एक सय ११ र द्वितीय पुरस्कार रु ५१ हजार एक सय ११ नगद, मेडल र प्रमाणपत्र प्रदान गरिनेछ । त्यस्तै उत्कृष्ट खेलाडीलाई रु दुई हजार, उत्कृष्ट गोलरक्षकलाई रु एक हजार पाँच सय र सर्वाधिक गोलकर्तालाई रु एक हजार पाँच सय नगद, ट्रफी र प्रमाणपत्र प्रदान गरिने आयोजकले जनाएको छ । रासस

शनिबार, २० माघ, २०८० गते

Comments

सम्बन्धित खवर

लोकप्रिय

धेरै पढिएको

संघर्षशिल युथ क्लबको दास्रो अधिवेशन सम्पन्न, अध्यक्षमा डुबा भोटे

किमाथांका नाका खोल्न परराष्ट्र मन्त्री साउदसँग सांसद दिपक खड्काको माग

संखुवासभाका अन्तराष्ट्रिय पदक विजेता नेपाली धावक निमेश गुरुङ सम्ममानित

राबा बैकको लोगोसंगै कार्यकारी प्रमुख किरण श्रेष्ठको तस्वीरले चुम्यो अफ्रिकाको चुचुरो

बर्दिवासको घाम बोलको गितमा गायक वाङछिरीङ भोटियाको अर्को सफलता

अन्तरपालिका स्तरिय फुटसल प्रतियोगिताको उपाधि धर्मदेबीलाई

आठ पटक सगरमाथा चढेका ज्याम्चाङ भोटेले हिमालबारे कीन भने यस्तो !

प्रधानमन्त्रीसंग किम्माथांका नाका खोल्न माग गरेका छौ : वाङछेदर भोटे

जापानमा बस्ने नेपालीहरुले नेपाल सम्झदै गरे नमस्ते साहित्यिक यात्रा

किमांथाका नाका यहि सेप्टेम्बरबाट खुल्ने अध्यक्ष वाङछेदर भोटेको खुलासा