संखुवासभाको खराङमा तेस्रो मिनि खेलकुद महोत्सव २०७९ हुने भएको छ ।

खेलकुद महोत्सवबारे जानकारी दिन आज काठमाडौमा आयोजित पत्रकार सम्मेलनमा आयोजक श्री किरण ज्योति युवा क्लवले युवाहरुलाई खेलकुद क्षेत्रमा सहभागि गराउँदै खेलकुद क्षेत्रको विकासकोलागि महोत्सव गर्न लागेको जनाएको छ । स्वास्थ्यकोलागि खेलकुद आवश्यक भएको भन्दै क्लबले बर्षेनी खेलकुदको आयोजना गर्दे आएको छ ।

यस पटक पनि माघे संक्रान्तिको अवसरमा तेस्रो मिनि खेलकुद महोत्सव २०७९ को आयोजना गर्नलागिएको क्लबका अध्यक्षले जानकारी दिनुभयो । आमन्त्रित प्रथम स्व. सुर्य बहादुर सोम्याहाङ्ग स्मृति कप पुरुष नकआउट फुटबल प्रतियोगिताको राशि प्रथम पुरस्कार १ लाख ११ हजार १ सय ११ रुपैया, दोस्रो ६६ हजार ६ सय ६६, सान्त्वना पुरस्कार दुई टिमलाई २२ हजार २ सय २२ रुपेया गरी ४४ हजार ४ सय ४४ रुपैया रहेको छ ।

त्यसैगरी आमन्त्रित महिला फुटबल प्रतियोगिता प्रथम ३३ हजार ३ सय ३३ रुपैया,दोस्रो २२ हजार २ सय २२ र सान्त्वना दुई टिमलाई ५ हजार गरी दश हजार रुपैया रहेको छ । युवा क्लवले खुल्ला जातजातिहरुको सामुहिक झाँकी प्रतियोगितासमेत आयोजना गरेको जनाएको छ ।

झाँकीमा प्रथम हुनेलाई दश हजार रुपैया, दोस्रोलाई ५ हजार रुपैया र सहभागि सबै टिमलाई सान्त्वना पुरस्कार दिने क्लबले जनाएको छ । उत्कृष्ट खेलाडीलाई आकर्षक पुरस्कारको व्यवस्थासमेत गरीएको आयोजक कल्बका अध्यक्षले जानकारी दिनुभयो ।

सोम्याहाङ्ग स्मृति कपमा सहभागि आठ टिम मध्य दुई टिम जिल्ला बाहिर र ६ टिम जिल्लाबाटै सहभागि हुने जनाईएको छ । त्यसैगरी महिला फुटबलमा जिल्ला भित्रबाटै ४ टिमको सहभागिता हुने आयोजक क्लबले जनाएको छ ।

आइतवार, ३ पुस, २०७९ गते