Trending
Saturday, April 25, 2026
कतारमा जारी फिफा विश्वकप फुटबलको सेमिफाइनलदेखि म्याच बल परिवर्तन हुने भएको छ ।
समुह चरणदेखि प्रयोग हुँदै आएको ‘अल रिहला’ नामको बल अब सेमिफाइनल र फाइनल खेलमा प्रयोग हुने छैन । फिफा र एडिडासले बाँकी खेलका लागि ‘अल हिल्म’ नामक बल सार्वजनिक गरेका छन् । अल हिल्म अरबी शब्द हो र यसको अर्थ ‘सपना’ हुन्छ । यसअघि प्रयोग भएको बल ‘अल रिहला’ को अर्थ भने ‘यात्रा’ रहेको थियो ।
यसअघि अल रिहला बलमा जस्तै यस बलमा पनि ‘कनेक्टेड बल टेक्नोलोजी’को प्रयोग गरिएको छ । यसले रेफ्रीहरुलाई निर्णय लिन निकै मदत पुगेको एडिडासले जनाएको छ । यस बलको डिजाइनमा सुनौलो रंग प्रयोग गरिएको छ । यसमा प्रयोग गरिएको त्रिकोणात्मक आकारले दोहा र वरपरको मरभुमीको प्रारूप दिन्छ । यस्तै फिफा विश्वकपको रंग र कतारको झण्डाको स्वरूप पनि प्रयोग गरिएको छ ।
यसपटक अल रिहलाको प्रयोगमार्फत ‘अर्ध स्वचालित अफसाइड प्रविधि’ को नयाँ प्रयोग पनि गरीएको थियो । यसले बललाई आधुनिक प्रणालीसँग जोडेको छ ।
