टी ट्वान्टी विश्वकपको खेल तालिका सार्वजनिक

अन्तर्राष्ट्रिय क्रिकेट काउन्सिल (आईसीसी)ले टी ट्वान्टी विश्वकप क्रिकेट अगामी अक्टोबर १७ (असोज ३१ गते) देखि सुरु हुने गरी तालिका सार्वजनिक गरेको छ । यूएईमा सुरु हुने प्रतियोगिता कात्र्तिक २८ सम्म चल्नेछ ।

प्रतियोगिताको सुरुवात राउन्ड एक अन्तर्गतको खेलबाट हुनेछ । जसमा आईसीसी टी ट्वान्टी वरीयताको पुछारमा रहेका टोलीले छनोट खेल्नुपर्नेछ । पहिलो दिन उद्घाटन खेलमा ओमानले पपुवान्यूगिनीको सामना गर्नेछ । स्कटल्याण्डले बङ्गलादेशको सामना गर्नेछ ।

प्रतियोगिताको दोस्रो दिन आयरल्याण्ड, नेदरल्याण्ड्स, श्रीलङ्का र नामीबियाले स्पर्धा गर्नेछन् । छनोट खेलहरु अक्टोबर २२ सम्म हुनेछ । दुई समूहबाट दुई दुई टोली छनोट भएर सुपर १२ चरणको पुग्नेछन् ।

२३ अक्टोबरदेखि आईसीसी टी ट्वान्टी विश्वकप क्रिकेटको सुपर १२ को खेलहरु सुरु हुनेछ । सुपर १२ को पहिलो खेलमा समूह १ मा रहेको अष्ट्रेलियाले दक्षिण अफ्रिकाको सामना गर्नेछ । साँझ इंग्ल्याण्ड र वेष्टइन्डिजको स्पर्धा हुनेछ ।
पुराना प्रतिद्वन्दी इंग्ल्याण्ड र अष्ट्रेलियाले भने अक्टोबर ३० मा दुबईमा एक अर्का विरुद्ध उत्रिनेछन् ।

समूह २ को पहिलो खेलमा विश्वकप टी ट्वान्टी क्रिकेटकै सबैभन्दा रोमाञ्चक खेल हुने विश्वास गरिएको छ । २४ अक्टोबरका दिन पाकिस्तानले दुबईमा साँझ छ बजे भारतको सामना गर्नेछ । करिब दुई वर्षपछि मात्रै भारतले अन्तर्राष्ट्रिय क्रिकेटमा पाकिस्तानको सामना गर्न लागेको हो ।

नोभेम्बर ८ मा समूह चरणको खेल सम्पन्न हुनेछ । पहिलो सेमिफाइनल खेल नोभेम्बर १० मा अबुधाबीमा खेलाइनेछ । दोस्रो सेमिफाइनल खेल दुबईले ११ नोभेम्बरमा आयोजना गर्नेछ । दुबै सेमिफाइनल खेलका लागि रिजर्भ डे राखिएको छ ।

नोभेम्बर १४, आइतबारका दिन दुबईले साँझ छ बजे टी ट्वान्टी विश्वकप क्रिकेटको उपाधिका लागि हुने खेलको आयोजना गर्नेछ । फाइनलका लागि समेत भोलिपल्ट सोमबार आरक्षित दिन राखिएको छ ।