बालबालिकाको क्यान्सरमा प्रयोग हुने ३५ प्रकारका औषधि नि:शुल्क प्राप्त गर्दै

नेपालले बालबालिकामा हुने क्यान्सर रोगको उपचारका लागि ३५ प्रकारका औषधि नि:शुल्क प्राप्त गर्ने भएको छ । ग्लोवल इनिसियटिभ फर चाइल्डहुड क्यान्सर(जीआईसीसी)ले विश्व स्वास्थ्य संगठन र अमेरिकास्थित सेन्ट जुड चिल्ड्रेन रिसर्च हस्पिटलसंगको सहकार्यमा क्यान्सर ३५ प्रकारका औषधिहरु निशुल्क रुपमा उपलव्ध गराउन लागेको हो ।

यस सम्बन्धी कार्यलाई अघि बढाउन गत २९ र ३० चैतमा अमेरिकाको टेनिसी राज्यस्थित मेम्फिस शहरमा ग्लोबल प्लेटफर्म टू एक्सेस चाइल्डहुड क्यान्सर मेडिसिन (जीपीएसीसीएम) प्रि -लन्च गरिएको थियो । सो कार्यक्रममा भाग लिन नेपालबाट स्वास्थ्य सचिव देवकुमारी गुरागाईँको नेतृत्वमा मन्त्रालय र विभिन्न अस्पतालका निर्देशक सहितको प्रतिनिधिमण्डल अमेरिका पुगेको छ ।

नेपालमा प्रत्येक वर्ष १ हजार ५०० बढी बालबालिकाहरु विभिन्न क्यान्सर रोगबाट ग्रतिस हुने गरेका छन् । त्यसमध्ये धेरै जसोमा रक्त क्यान्सर रहेको पाइन्छ । बालबालिकामा हुने रक्त क्यान्सर समयमै निदान र उपचार गर्न सकेमा ८० प्रतिशत पूर्ण रुपमा निको हुने अनुसन्धानले देखाएको छ । तर नेपालमा समयमै रोगको निदान नहुँदा, स्तरीय उपचारको साथै पूर्ण मात्रामा उपचार नगर्दा, सबै औषधि समयमै नपाउँदा, रोगको उपचारको समयमा विभिन्न स्वास्थ्य समस्याको समयमै व्यवस्थापन नहुँदा धेरै बालबालिकाहरुको ज्यान गइरहेको छ ।

यस्ता समस्यालाई समाधान गर्दै बालबालिकामा देखिने क्यान्सरको समयमै निदान र उपचार गर्ने व्यवस्था मिलाउन जीआईसीसीले यो अभियान सुरु गरको हो । यस अभियानमा जीआईसीसीले सन् २०३० सम्म १० लाख क्यान्सर पिडीत बालबालिकालाई बचाउने र विश्वभरी ६० प्रतिशत क्यान्सर निको गर्ने लक्ष्य लिएको छ ।

यो कार्यक्रमको पहिलो चरणमा जीआईसीसीले नेपाल सहित ६ वटा देशमा ३५ प्रकारका औषधिहरु निशुल्क उपलव्ध गराउने छ । अन्य देशहरुमा जाम्बिया, ईक्वेडर, उजेकिस्तान, जोर्डन र मंगोलिया रहेका छन् । दोस्रो चरणमा अन्य छ वटा देशमा विस्तार गरि सन् २०३० सम्म यो कार्यक्रम ५० देशमा पुरयाउने र १५ लाख क्यान्सर पिडीत बालबालिकाहरुलाई बचाउँने लक्ष्य लिइएको छ ।

जीआईसीसी अन्तरगर्त कान्ति बाल अस्पताल, वीपी कोइराला मेमोरियल क्यान्सर अस्पताल,भक्तपुर क्यान्सर अस्पताल र अन्य सरकारी तथा गैरसरकारी अस्पतालमा उपचार गरेका क्यान्सर पिडीत बालबालिकाहरु मध्ये सन् २०३० सम्म ६० प्रतिशतलाई निको गराउने लक्ष्य सहित ३५ प्रकारका औषधि निशुल्क उपलव्ध गराईने बताइएको छ ।

अमेरिकामा रहेको सचिव गुरागाईँ नेतृत्वको टोलीले निशुल्क औषधि उपलव्ध गराउने कार्ययोजनाका लागि आवश्यक छलफल तथा बैठकमा भाग लिई रहेको बताइएको छ । सचिव गुरागाईँले आगामी यस कार्यक्रमका लागि आगामी जुन महिनामा बालबालिकाको क्यान्सर सम्वन्धी बृहत कार्याशाला गोष्ठीको आयोजना गरिने समेत बताईन् ।

उनले सो कार्यक्रममा औषधि सहयोग गर्ने डब्लुएचओ, सेन्ट जुड चिल्ड्रेन रिसर्च हस्पिटलका प्रतिनिधि सहित यो कार्यक्रम लागू भएका अन्य देशका प्रतिनिधि समेत सहभागी हुने बताईन् ।