आँखा शिविरबाट पाँचथरको याङवरक ५३० जना बिरामी लाभान्वित

 

पाँचथरको याङवरक गाउँपालिकामा संचालन भएको २ दिने आँखा शिविरबाट ५ सय जना भन्दा बढी सेवाग्राही लाभान्वित भएका छन् ।

याङवरक गाउँपालिका तथा नेत्र ज्योति संघ ताप्लेजुङको सहकार्यमा संचालित उक्त शिविरबाट ५ सय ३० जना सेवाग्राही लाभान्वित भएका हुन् ।

जस अन्तर्गत २ सय ४७ जना महिला र २ सय ८३ जना पुरुष रहेका छन् । ३६ जनाको मोतिया विन्दुको अप्रेशन गरिएको थियो भने ३ सय ८ जनाको स्वास्थ्य चेक जाँच तथा औषधि वितरण गरिएको थियो ।

त्यस्तै १ सय ८६ जनालाई चश्मा वितरण गरिएको गाउँपालिकाका न्यायिक समिति उजुरी फाँटका प्रमुख गणेश खतिवडाले बताउनुभयो ।

पालिकाको केन्द्र थर्पु स्थित सामुदायिक स्वास्थ्य इकाईको भवनमा शिविर यहि पुस १७ गतेदेखि १८ गतेसम्म संचालन भएको थियो ।

आँखाको उपचारका लागि तराईका सुविधा सम्पन्न अस्पतालमा जानुपर्ने जसका कारण यस क्षेत्रका नागरिकहरुलाई समस्या हुने भएको हुँदा गाउँघरमै आँखा शिविर संचालन गरिएको गाउँपालिका अध्यक्ष भीमबहादुर योङ्या (सुवास) ले बताउनुभयो ।

आँखा उपचार केन्द्र सञ्चालनमा आएपछि पाँचथरको याङवरकसहित हिलिहाङ र फालेलुङ तथा ताप्लेजुङका सिरिजंगा र सिदिङमा गाउँपालिकाका बिरामी प्रत्यक्ष लाभान्वित हुने गाउँपालिकाका उपाध्यक्ष बाबा मेन्याङबोले बताउनुभयो ।

सामुदायिक स्वास्थ्य भवनमा संचालन भइरहेको शिविर पश्चात पनि आँखा उपचार केन्द्रमा एक जना नेत्र सहायकसहित २ जना कर्मचारीले नियमित आँखा जाँच र उपचारको सेवा दिने गाउँपालिकाका प्रमूख प्रशासकीय अधिकृत सुमन लिङदेनले जानकारी दिनुभयो ।