Trending
Thursday, June 25, 2026
काठमाडौंको वसन्तपुरस्थित हनुमानढोका दरबारमा तीन तले चीर ठड्याएपछि यस वर्षको फागु पर्व (होली) सुरु भएको छ।
आज बिहान ८:३३ बजेको शुभसाइतमा मानन्धर समुदायका व्यक्तिहरूले रंगीचंगी ध्वजासहितको चीर ठड्याएर र एकार्कालाई अबिर दली होली पर्व सुरु भएको जनाउ दिएका छन्।
पशुपतिनाथ, हनुमानढोका दरबारको सुन्दरीचोक, ललितपुरको पाटन दरबार क्षेत्रको कृष्णमन्दिर प्रांगणमा पनि रंगीचंगी कपडा झुन्ड्याएर होली सुरु भएको जनाउ दिने गरिन्छ।
असत्यमाथि सत्यको जितको रूपमा चीर ठड्याइन्छ। चीर ठड्याइसकेपछि विधिवत् रूपमा होली पर्व सुरु भएको मानिन्छ।
यो वर्षको होली फागुन २९ र चैत १ गते परेको छ। २९ गते काठमाडौं उपत्यका लगायत हिमाली र पहाडी जिल्लामा र चैत १ गते तराईमा होली परेको छ। दुवै दिन सार्वजनिक बिदा दिइएको छ।
