दुई दिन देशव्यापी ठुलो वर्षा हुने

हाल देशभर मनसुनी वायुको उच्च प्रभाव रहेको छ। मनसुनको न्यून चापीय रेखा सरदर स्थानको उत्तरतर्फ अवस्थित छ।

आज कोशी, मधेश, बागमती र गण्डकी प्रदेशको केही स्थानहरूमा साथै लुम्बिनी, कर्णाली र सुदूरपश्चिम प्रदेशका थोरै स्थानहरूमा वर्षा भइरहेको छ।

आज दिउँसोː देशभर साधारणतया बदली रहने छ। सबै प्रदेशका धेरै स्थानहरूमा मेघ गर्जन/चट्यांगसहित हल्कादेखि मध्यम वर्षाको सम्भावना रहेको छ। कोशी, मधेश, बागमती, गण्डकी, लुम्बिनी र सुदूरपश्चिम प्रदेशका एक-दुई स्थानमा भारी वर्षाको सम्भावना रहेको छ। कोशी, बागमती, गण्डकी र लुम्बिनी प्रदेशका एक-दुई स्थानमा धेरै भारी वर्षाको पनि सम्भावना रहेको छ ।

आज राति देशभर साधारणतया बदली रहने छ। सबै प्रदेशका धेरै स्थानहरूमा मेघ गर्जन/चट्याङसहित हल्कादेखि मध्यम वर्षाको सम्भावना रहेको छ। सबै प्रदेशका थोरै स्थानहरूमा भारीदेखि धेरै भारी वर्षाको सम्भावना रहेको छ। साथै बागमती, गण्डकी, लुम्बिनी प्रदेशका एक-दुई स्थानमा अति भारी वर्षाको पनि सम्भावना रहको छ।

मौसम पूर्वानुमान महाशाखाले कोशी प्रदेशका ताप्लेजुङ, पाँचथर, संखुवासभा र तेह्रथुम, बागमतीका रसुवा, चितवन, सिन्धुपाल्चोक, धादिङ, नुवाकोट र दोलखा जिल्लालाई उच्च जोखिममा रहेको राखेको छ।

यस्तै, गण्डकीका म्याग्दी, बागलुङ, कास्की, पर्वत, स्याङ्ज्या, तनहुँ, नवलपरासी, लमजुङ र गोरखा पनि उच्च जोखिममा रहेका छन्।

यसैगरी, लुम्बिनी प्रदेशका कपिलवस्तु, रुपन्देही, पाल्पा, गुल्मी, नवलपरासी(पश्चिम), दाङ, बाँके, बर्दिया, प्युठान र अर्घाखाँची उच्च जोखिममा रहेका छन्।

त्यस्तै, सुदूरपश्चिममा कैलाली, कञ्चनपुर, डडेलधुरा, डोटी र बैतडीमा पनि उच्च जोखिममा रहेको महाशाखाले जनाएको छ।

महाशाखाका अनुसार मध्यम जोखिममा ओखलढुंगा, मोरङ, झापालगायतका जिल्लाहरू रहेका छन्।