माया खोलाको १४.९ मेगावाटको विद्युत राष्ट्रिय प्रणालीमा जोडियो

संखुवासभामा निर्माण सम्पन्न १४.९ मेगावाटको मायाखोला जलविद्युत आयोजनाको विद्युत राष्ट्रिय प्रसारण प्रणालीमा जोडिएको छ ।मायाखोला हाइड्रो पावर कम्पनीले निर्माण सम्पन्न गरेको आयोजनाको आन्तरिक परीक्षण सफल भएपछि एउटा युनिटको विद्युत ग्रिडमा जोडिएको हो ।

आयोजनाको उपकरणहरूलगायत सबै क्षेत्रको परीक्षण पूरा भएपछि फागुन ४ गतेदेखि प्रसारण प्रणालीमा जोडिएको आयोजना संयोजक भरत थापाले बताउनुभयो । ‘अहिले एउटा युनिटको विद्युत मात्र प्रसारण प्रणालीमा जोडिएको छ’, उहाँले भन्नुभयो, ‘अर्को युनिटको विद्युत एक साताभित्र जोडिनेछ ।’

उत्पादन परिक्षण थाल्ने क्रममा एउटा युनिटमा समस्या आएकोले अहिले मर्मतको काम भइरहेको छ । मर्मतको काम सम्पन्न ३/४ दिन लाग्नेछ । ’आयोजनाको दोस्रो युनिटको विद्युत पनि प्रणालीमा जोडिएपछि मात्र नेपाल विद्युत प्राधिकरणलाई दुई साता निशुल्क विद्युत दिइनेछ, त्यसपछि मात्र व्यापारिक उत्पादन सुरु हुनेछ’ उहाँले भन्नुभयो । आयोजनामा ७.७५ मेगावाटको दुई वटा उत्पादन युनिट छन् ।

राष्ट्रिय ग्रिडमा जोडिएको युनिटबाट अहिले ३ मेगावाट विद्युत उत्पादन भइरहेको थापाले बताए । आयोजनाको विद्युत ३ किलोमिटर दुरीमा रहेको प्राधिकरणको कोसी कोरिडोरको तुम्लिङटार–इनरुवा खण्डको बानेश्वर सबस्टेसनमा जोडिएको छ । सबस्टेसनसम्मको आवश्यक ३३ केभी लाइन कम्पनीले आफैले निर्माण गरेको हो ।

आयोजनाको निर्माण सम्पन्न गरी २०७८ असारदेखि विद्युत उत्पादन गर्ने तालिका थियो । तर, कोरोना महामारीको दोस्रो लहरमा ४० जना बढी कामदार तथा कर्मचारी संक्रमित भएपछि निर्माण प्रभावित हुँदा विद्युत उत्पादन हुने तालिका प्रभावित भएको हो ।

आयोजनाले वार्षिक ८ करोड १५ लाख ६५ हजार ६ सय ५४ किलोवाट विद्युत उत्पादन गर्ने कम्पनीले जनाएको छ । यो आयोजना सम्पन्न गर्न २ अर्ब ५० करोड रुपैयाँ लागत अनुमान गरिएको छ । माया खोला ‘सुपर सिक्स’ अन्तर्गत प्रतिस्पर्धा गराएर निजी क्षेत्रलाई निर्माण गर्न दिइएको आयोजना हो ।