खोटाङमा तीन हजार ४१० मेट्रिकटन सुन्तला उत्पादन

यो वर्ष खोटाङमा तीन हजार ४१० मेट्रिकटन सुन्तला उत्पादन भएको छ। जिल्लाका अधिकांश कृषकले उत्पादन गरेका सुन्तला ठेकेदारले बगानबाटै खरिद गरिरहेका जिल्लास्थित कृषि ज्ञान केन्द्रले जनाएको छ।

जिल्लामा उत्पादित सुन्तला प्रतिकिलो सरदरमा १०० रुपैयाँका दरले बिक्री गर्दा यो वर्ष ३४ करोड १० लाख रुपैयाँ आम्दानी हुने केन्द्रका अर्थविज्ञ दीपक चौहानले जानकारी दिए।

‘यो वर्ष जन्तेढुंगा र दिप्रुङ चुइचुम्मा गाउँपालिकामा सबैभन्दा बढी सुन्तला उत्पादन भएको छ। जन्तेढुंगा गाउँपालिकाबाट चार करोड ५० लाख रुपैयाँभन्दा बढीको सुन्तला बिक्री भएको छ,’ उनले भने, ‘कृषक आफैले बजार लगेर बिक्री गर्दा प्रतिकिलो १३० रुपैयाँसम्म पर्छ। कृषकबाट खरिद गरिएका सुन्तला व्यापारीले प्रतिकिलो १५० रुपैयाँमा बिक्री गर्छन्।’

कृषि ज्ञान केन्द्रले दिएको जानकारीअनुसार जिल्लाका १० वटै स्थानीय तहमा गत वर्षको तुलानामा यस वर्ष १५ हेक्टर जमिनमा सुन्तला उत्पादन घटेको छ। गत वर्ष ९९५ हेक्टरमा सुन्तला उत्पादन भएकामा यस वर्ष विभिन्न रोगको संक्रमणका कारण ९८० हेक्टर खेती गरिएको थियो।

व्यावसायिक सुन्तलाखेती गरिरहेका जन्तेढुंगा-६, दिप्लुङका जगत किरातीले यो वर्ष सात लाख रुपैयाँ आम्दानी गरेको जानकारी दिए। ‘यातायातको सुविधाले यस वर्ष बगानबाटै सुन्तला बेचियो,’ उनले भने, ‘सुन्तलाखेतीलाई विस्तार गरिरहेको छु। आगामी वर्ष अझ बढी आम्दानी हुने अनुमान छ।’

फलफूल तथा तरकारीको व्यावसायिक खेती गरेका किरातीले २५० वटा बोटमा फलेका सुन्तला बेचेर मंसिरमा मात्रै सात लाख रुपैयाँ आम्दानी भएको जानकारी दिए। दिप्लुङका किराती मात्र नभई अन्य कृषकले पनि सुन्तला बिक्रीबाट लाखौँ रुपैयाँ आम्दानी गरेका गाउँपालिकाले जनाएको छ।

जिल्लाको दक्षिणी क्षेत्रमा पर्ने यो गाउँपालिकाको घोर्ले, सातमारा, केराबारी, सोभे, फगतपुर, पाथीभरा, भीरगाउँ, वाचीपाला, खुटा, कात्तिकेलगायत क्षेत्रका किसानले व्यावसायिक सुन्तलाखेती गर्दै आएका छन्। बूढापाकाले खानका लागि रोपेका सुन्तला यातायातको सुविधा आएसँगै आम्दानीको स्रोत बन्न थालेको कृषकहरूको भनाइ छ।

जन्तेढुङ्गा-५, चिसापानीस्थित घोर्ले गाउँका कृषकले यस वर्ष एक करोड रुपैयाँभन्दा बढीको सुन्तला बिक्री गरेका गाउँपालिकाकी अध्यक्ष अरुणादेवी राईले जानकारी दिइन्। ‘घोर्लेमा ३१ परिवारको बसोबास छ। सबैका घरमा सुन्तलाको बगान छन्। सबै घरले हरेक वर्ष तीन लाख रुपैयाँभन्दा बढीको सुन्तला बिक्री गर्छन्,’ उनले भनिन्, ‘घोर्लेमा पुर्खाकै पालादेखि सुन्तला उत्पादन हुन्थ्यो। पहिले खानका लागि पुर्खाले रोपेका सुन्तला अहिले आम्दानीको स्रोत बनेको छ। यसलाई प्रवर्द्धन गर्न गाउँपालिकाको तर्फबाट सहयोग गर्दै आएका छौँ।’

दिप्रुङ चुइचुम्मा गाउँपालिका-१, याम्खाका कृषक रामबहादुर कुँवरले यो वर्ष सुन्तलाबाट कम्तीमा १२ लाख रुपैयाँ आम्दानी हुने अनुमान गरेका छन्। गत वर्ष नौ लाख रुपैयाँ आम्दानी भएकामा यो वर्ष उत्पादन बढेकाले आम्दानी बढ्ने उनले बताए।

खोटेहाङ गाउँपालिकाका किसानले सुन्तला बिक्रीबाट बर्सेनि लाखौँ आम्दानी गर्ने वडा नं. ६, इन्द्रेणीपोखरीका युवा कृषक इन्द्र नारथुङेले बताए। गाउँपालिकामध्ये सबैभन्दा ठूलो (नौ वडा रहेको) यो पालिकामा गत वर्षको तुलनामा यस वर्ष सुन्तलाको उत्पादन घटेको कृषकहरूले बताएका छन्।

कृषि ज्ञान केन्द्रले दिएको जानकारीअनुसार यस वर्ष रावाबेँसी गाउँपालिकामा सुन्तलाको उत्पादनमा कमी आएको छ। खोटाङमा सुन्तलाको राजधानी भनेर चिनिने रावाबेँसी-३, लामीडाँडामा रोग र संक्रमणले क्षति पुर्‍याउँदा उत्पादन घटेको केन्द्रका अर्थविज्ञ चौहानले जानकारी दिए।

दिक्तेल रूपाकोट मझुवागढी नगरपालिका-११, खार्मीस्थित रुधालुङका कृषकले उत्पादन गरेका सुन्तला यस वर्ष बगानबाटै बिक्री भएका स्थानीय शुभचन्द्र राईले जानकारी दिए। खार्मीमा उत्पादित सुन्तला सालपा कृषि कम्पनी खोटाङले प्रतिकिलो ६० रुपैयाँमा खरिद गरेको छ। रासस