मिथिलाञ्चलमा छठ पर्वको तयारी शुरु

तिहार पर्वको समापनसँगै छठ पर्वको धमाधम तयारी शुरु भएको छ।

मिथिलाको प्रमुख पर्वको रूपमा मानिने छठका लागि यहाँका पोखरी, नदी, तलाउहरुमा तयारी शुरु भएको जलेश्वर नगरपालिका- ५ का संस्कृतिविद् ध्रुव रायले जानकारी दिए। सूर्य भगवान् तथा छठी माताको पूजा पानीमै गरिने भएकाले मिथिलाञ्चलका जलाशयमा सरसफाई, घाट निर्माण, खाल्डाखुल्डी पुर्ने, सडक मर्मत भइरहेको जलेश्वर नगरपालिका- ८ का वडा अध्यक्ष विजयकुमार सिंहले जानकारी दिए।

सूर्य तथा छठीमाताको पूजाका लागि जलेश्वर नगरपालिका- ८ स्थित पाठक पोखरीको बीचमा बाँस र काठको प्रयोग गरेर मन्दिर निर्माण, मन्दिरमा पुग्न पानीमै तैरिने बाँसको बाटो निर्माण गरिँदैछ। ५०० मिटरसम्म गुफाबाला पण्डाल, विभिन्न साजसज्जा र बत्ती जडान गरिरहेको छठपूजा समितिका संयोजक केशव झाले जानकारी दिए।

जलेश्वर नगरपालिका- १स्थित बरुण सरोवरमा पनि छठ पर्वको लागि चारैतिर ठूल–ठूला पण्डाल, रंगीचङ्गी साजसज्जा भइरहेको वडा अध्यक्ष अनिल झाले बताए।

यसैगरी जिल्लाको मटिहानी, गौशाला, औरही, बलवा, लोहारपट्टीलगायतका स्थानमा नदीमा छठ पर्व मनाउने चलन रहेकाले ती स्थानका नदीहरुमा धमाधम तयारी भइरहेको जिल्ला समन्वय समितिका संयोजक सुमनकुमार लाल कर्णले बताए।