अलैँचीको मूल्य घट्यो, प्रतिमन ८० हजार

सङ्खुवासभामा यो वर्ष अलैँचीको मूल्य घटेको छ। गतवर्ष यही समयमा प्रतिमन (४० किलो) ९० हजार मूल्य रहेकामा यसपटक भने ८० हजारमा कारोबार भइरहेको छ।

एक दशक अघिदेखि ओरालो लागेको अलैँचीको मूल्य गत वर्ष सुधार भए पनि यसवर्ष फेरि मूल्य घटेको छ।

कालो सुनको रूपमा चिनिँदै आएको अलैँचीको मूल्य प्रतिमन ८० हजारमा कारोबार भइरहेको अलैँची व्यवसायी महासङ्घ सङ्खुवासभाका अध्यक्ष कुमार श्रेष्ठले जानकारी दिए।

उनका अनुसार गतवर्ष प्रतिमन एक लाख १० हजारसम्म कारोबार भएको थियो। पछिल्लो समय अन्तरराष्ट्रिय बजारमा नेपाली अलैँचीको माग घटेपछि मूल्य पनि घटेको व्यवसायीको हो। “उत्पादन बढी र माग कम भएका कारणले अलैँचीको मूल्य घटेको हो।

गतवर्ष ९० देखि एक लाख १० हजारसम्म कारोबार भएको थियो। हाल ग्रेडिङ राम्रो भएको अलैँची ८२ हजार र ग्रेडिङ नभएको अलैँची ८० हजारमा कारोबार भइरहेको छ”, अध्यक्ष श्रेष्ठले भने।

मसलाको रूपमा प्रयोग हुँदै आएको अलैँची ९८ प्रतिशत अलैँची नेपाल बाहिर निर्यात हुने गरेको बताइन्छ।

सङ्खुवासभामा करिब दुई हजार ८७१ हेक्टर क्षेत्रफलमा अलैँचीखेती गरिँदै आएको छ। जिल्लामा गतवर्ष ९४० मेट्रिक टनभन्दा बढी उत्पादन भएको थियो।