बडा दशैं अन्तरगत आज सप्तमी, घर-घरमा फूलपाती भित्राइँदै

बडादशैैँ अन्र्तगत नवरात्रको सातौँ दिन आज पूजा कोठा वा दशैँ घरमा फूलपाती भित्र्याइँदै छ।

घटस्थापनाका दिनदेखि वैदिक विधिपूर्वक दुर्गालाई आह्वान गरी पूजाआजा गरिएको दशैँघर अथवा पूजाकोठामा आज उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र मानवृक्ष भित्र्याइन्छ।

नवपत्रिकाको नामले समेत चिनिने फूलपाती नौ देवीको प्रतिकका रुपमा भित्र्याई शास्त्रीय विधि अनुसार शक्तिको आराधनाका साथ पूजा गर्ने वैदिक विधि रहेको धर्मशास्त्रविद् प्रा.डा. रामचन्द्र गौतमले जानकारी दिए।

फूलपाती भित्र्याउनका लागि साइतको आवश्यकता नपर्ने पनि उनले बताए। नेपाली सेनाले सैनिक मञ्च टुँडिखेलमा आज दिउँसो राष्ट्रपति रामचन्द्र पौडेलससहित उच्च पदस्थ व्यक्तिसमेतको उपस्थितिमा फूलपाती बढाइँ गर्दैछ।

फूलपाती बढाइँ धर्म, संस्कृति र परम्परालाई निरन्तरता दिने विशिष्ट मौलिक कार्यक्रम मानिन्छ। गोरखाबाट ल्याइएको जमरा र फूलपाती हनुमानढोका दसैँघरमा साइत जुराएर भित्रयायसँगै टुँडिखेलमा फूलपाती बढाइँ गर्ने परम्परा छ। हनुमान ढोकामा यसवर्ष अपराह्न साँढे चार बजे भित्र्याउने कार्यक्रम छ।