Trending
Sunday, July 13, 2025
विश्वकै अग्लो शिखर सगरमाथा आरोहणका लागि अव नेपालकै कुनै एक ७ हजार मिटरभन्दा माथिको हिमाल अनिवार्य आरोहण गरेको हुनुपर्ने व्यवस्था गर्न लागिएको छ।
पर्यटनसम्बन्धी प्रचलित कानूनलाई संशोधन र एकीकरण गर्न बनेको विधेयक २०८१ मा उक्त व्यवस्था गरिएको हो। सगरमाथामा भिड बढ्दै गएपछि सरकारले नियमनको नयाँ तरिका अपनाएको हो।
राष्ट्रिय सभामा दर्ता भएको विधेयकको परिच्छेद ३ को पर्वतारोहणसम्बन्धी व्यवस्थाअन्तर्गत उपदफा ६ मा अन्यत्र जुनसुकै कुरा लेखिएको भए तापनि नेपालको कम्तीमा सात हजार मिटरभन्दा अग्लो कुनै एउटा हिमचुली आरोहण गरेको अभिलेख पेस गरेपछि मात्र सगरमाथा आरोहणको अनुमतिपत्र जारी गरिने व्यवस्था गरिएको छ।
वसन्तकालीन याममा सगरमाथा आरोहणका लागि २ सय ७७ जनाले अनुमति लिएका छन्। पर्यटन विभागका अनुसार ५० आरोही समूहका कुल २ सय ७७ जनाले अनुमति पाएका हुन्। आरोहण अनुमति लिएर विभिन्न मुलुकका आरोहीहरू धमाधम गन्तव्यतर्फ लागिरहेका छन्।
विधेयक संसदबाट पारित भएपछि मात्रै कार्यन्वयनमा जाने छ। यसबाट नेपालको अन्य हिमालको समेत प्रवर्द्धन हुनेछ।
