फेवातालमा छोडियो २५ हजार भुरा

विश्व सिमसार दिवसको अवसरमा पोखराको फेवातालमा २५ हजार माछाका भुरा छोडिएको छ।

पोखरा महानगर-६ को एक लाख ५० हजार रुपैयाँको सहयोगमा पोखरा–१८ सराङकोटस्थित फेवा हर्पन खोला मत्स्य सहकारी संस्थाले माछाको भुरा छोडेको हो।

तालमा सिल्भर कार्प, बिगहेड कार्प, ग्रास कार्प, नैनी र रहु जातका माछाका भुरा छोडिएको हो। तालमा माछाका भुरा छोड्दै पोखरा–६ का वडाध्यक्ष विष्णुबहादुर भट्टराईले दशकौँदेखि फेवातालमा आश्रित जलारी समुदायको आयस्तर वृद्धि गर्न प्रयास गरेको बताए।

उनले गत वर्ष पनि एक लाख रुपैयाँ बराबरको माछाका भुरा छोडेपछि जलारी समुदायले राम्रो आम्दानी गरेको र पोखरा महानगरपालिकाले पनि दोब्बर राजस्व आम्दानी गरेको जानकारी दिए। तालमा अवैध रूपमा माछा मार्ने कार्य रोक्न सबैको सहयोग आवश्यक रहेको भन्दै उनले माछा संरक्षणमा के–के गर्न सकिन्छ त्यसतर्फ पनि ध्यान पुर्‍याउनुपर्नेमा जोड दिए।

तालका जलकुम्भी झार हटाउन वडाले नै काम गर्ने उनको भनाइ छ। वडाध्यक्ष भट्टराईले वडाले यो कार्यलाई आगामी वर्षमा पनि निरन्तर दिने भन्दै जलारी समुदायको हरेक दुःखसुखमा आफूले साथ दिने बताए।

तीव्रगतिमा भइरहेको सिमसार क्षेत्रको ह्रास रोक्न जनचेतना बढाउने तथा सिमसार क्षेत्रको संरक्षण र पुनःस्थापनाको गर्ने उद्देश्यले यो दिवस मनाइँदै आइएको छ। कुल १७२ राष्ट्रले अंगीकार गरेको यस महासन्धिमा सहभागी हुने देशले अन्ताराष्ट्रिय महत्त्वका सिमसार क्षेत्रको सूची (रामसार क्षेत्र)मा कम्तीमा एउटा जलाधार समावेश गर्नैपर्ने नियम छ।