कृष्ण धारावासीले गरे युवराज नयाँघरेको ‘आगोको बीउ’ को लोकार्पण

आगो शब्द त्यसै पनि कडा छ । भनिन्छ आगोसंग नखेल्नु । तर, आज काठमाडौमा त्यस्तै आगोसंग खेल्ने काम भएको छ । अर्थात त्यसमा पनि आगोको बीउसंग । लाग्ला आगोको बीउ कसरी हुन्छ ? तर, नयाँघरेले यसपटक भने अन्य पुस्तक भन्दा कडा र नयाँ शैलीको पुस्तक पाठकबीच ल्याउनु भएको छ । जुन उहाँले पाठकहरुलाई दशैंको कोशेली भनेर नी परिभाषित गर्नुभएको छ । अझआगोको बीउ आगो झै भएर आएको बिश्लेषण गरेकाछन सहभागिले पनि । जुन रत्न पुस्तक भण्डारले पाठकको हातहातमा पुर्याउने संकल्प लिएर दशै अगाबै प्रकाशन गरेको छ ।

निबन्धकार तथा नियात्राकार युवराज नयाँघरेको १९ औं कृति हो ‘आगोको बीउ’ । जुन निबन्ध संग्रहको आज लोकार्पण भएको हो । वरिष्ठ आख्यानकार, निवन्धकार, कवि तथा समालोचक कृष्ण धारावासीले प्रज्ञा प्रतिष्ठानमा आयोजित एक कार्यक्रमकाबीच कृतिको एक भव्य कार्यक्रमकाबीच लोकार्पण गरेका हुन । धरावासीले आफुलाई सबैभन्दा बढी मनपर्ने विधा नै निवन्ध रहेको र ‘आगोको बीउ’ पढ्दा आफुलाई एकदमै आनन्द महशुस भएको बताए । निबन्धकार नयाँघरेलाई लेखन यात्रामा निरन्तर हिड्न र यस्ता कृति सृजना गरिरहन सुझाव दिदै उनले भने ‘साच्चै नै उहाँको लेखमा जादु छ ।

विषयलाई जस्ताको तस्तै लेख्ने क्षमता उहाँमा भएको बताउनुभयो । आगोको बीउ नाम जस्तो पढ्दा पनि त्यस्तै पाएको उन्को टिप्पणी थियो । आख्यानकार तथा निवन्धकार अनिता कोइरालाले कृतिको नाम आगोको बीउ भएपनि पुस्तकभरि यो शब्द बिम्वकोरुपमा प्रयोग भएको बताइन । यस्तै कवि, आख्यानकार तथा समालोचक भारती न्यौपानेले नयाँघरेका निवन्धहरुमा विचारको बिस्कुन देख्न सकिने भन्दै यो निवन्ध पढिसकेपछि सारा संसारमा आगोको बीउ सनसनी फैलिने बताइन ।

पुस्तकमा भूमिका लेखनसमेत गरेकी निवन्धकार तथा समालोचक कुमारी लामाले आफुलाई यो कृति अत्याधिक मन परेर नै भूमिका लेखेको बताइन । ‘जीवन र मृत्युको दोसाधबाट अगाडि बढेका तथा अनुभव, अनुभूति र ज्ञानले खारिएका दार्शनिक चेतानायुक्त कुराहरु समेटिएको निवन्ध कृति आगोको बीउ हो’ उनले भनिन । यस्तै निवन्धकार तथा समालोचक ज्ञानु अधिकारीले ‘आगोको बीउ’ शिर्षकले नै तरंगित पार्ने बताउदै यसले मानवभित्र रहेको संवेदनालाई संयमित बनाउने बताइन । कार्यक्रममा बोल्दै कृतिकार नयाँघरेले आफु निवन्ध र नियात्रा लेखनको क्षेत्रबाट बाहिर जानै नसक्ने बताए । उनले भने ‘निबन्ध मेरा लागि यात्रा गर्दा टेक्ने दह्रो लठ्ठी हो । हिड्दा आवाज आउँछ त्यो आवाज मेरो नियात्राका बान्की हुन् भने पुग्ने गन्तव्य मेरो निबन्धको आधार हो ।’

२०६५ सालमा आत्मपरक निबन्धसंग्रह ‘एक हातको ताली’मा मदन पुरस्कार पाएका उनका यसअघि ९ वटा नियात्रासंग्रह र १० वटा निबन्धका कृति आएका छन् । ‘आगोको बीउ’ कृतिमा २६ वटा आत्मपरक निबन्धहरू समावेश गरिएको छ ।
निबन्ध लेखेरै आफ्नो भिन्न पहिचान बनाएका नयाँघरेको यो संग्रह रत्न पुस्तक भण्डारले प्रकाशनमा ल्याएको हो । आफुलाई निबन्ध र नियात्रा लेखनमा समानान्तर रूपमा उभ्याउने नयाँघरे नयाँ शैल्पिक लेखन र कथ्य कलामा विशेष छवि बनाएका लेखकका रूपमा परिचित छन् ।