सपनामा पनि हिमालसंगै कुरा हुन्छ आरोहि लाक्पाको

आरोही लाक्पा शेर्पालाई लागेकै थिएन की अफ्रीकाको सबै भन्दा अग्लो हिमाल किलिमन्जरो हिमालको सफल आरोहण गरौला भन्ने । बिभिन्न हिमाल चुम्दै चुम्दै हिमाल आरोहणमा लगातार लागेका उन्लाई तुलनात्मक रुपमा कठिनाइ होला भन्ने थियो । उनमा अफ्रीकाको सबैभन्दा अग्लो र प्रमुख चुचुरो किलिमन्जरो ५८९५ मिटर अग्लो हिमालको आरोहण गर्ने हुटहुटी त थियो नै । अत्यन्त उत्साहकासाथ आरोहणयात्रा तय गर्दै बुधबार भदौ ६ गते बिहान शेर्पाले यो चुचुरोमा पुगेर राष्ट्रिय झण्डा फहराउन सफल भए । क्षणभरमै बदलिरहने मौसमका कारण कतिबेला के हुन्छ अनुमान लगाउनै नसकिने प्रकृतिको नियम कठिन त छ नै । तर पनि नेपालको नाम राख्न र राष्ट्रिय झण्डा फहराउन उनी सफल भए ।
हिमाल नाम एउटै लाग्छ तर, फरक भनेको हिमालको उचाइ मात्रै हो । हिउँ उस्तै उस्तै हो, कतै मौसमको कारणले प्रभाव पार्छ । कतै सुख्खा हिमाल हुन्छ । हिमाल पिच्छे दृष्य फरक र अनुभूति फरक हुन्छ । मौसममा आएको अदली बदलीले बढाउने त्रास सबै उस्तै हुन् । धेरै हिमाल चढेर बेग्ला बेग्लै अनुभूति लिएका शेर्पाले आजकाल आफूलाई हिमाल र लाक्पा उस्तै उस्तै अनुभूति गर्न थालेकाछन् । हिमालकै कुरा हुन्छ र हिमालसंगै कुराकानी भएको महसुस उन्लाई हुन्छ । अनि सपना र बिपनामा पनि हिमालसंगै हुन्छन उनी । शेर्पाको पर्वतारोहणको चाँजोपाजो सभेन समिट ट्रेकले मिलाएको थियो ।
अफ्रीकाको हिमाल आरोहणका क्रममा नेपालको प्रचारप्रसार र सगरमाथा, लुम्बिनीलगायत नेपालका पर्यटकीयस्थलका बारेमा जानकारी दिएका शेर्पाले नेपाल भ्रमणको निम्तो दिएका थिए ।

संखुवासभा मकालुका शेर्पाले यसअघि बिभिन्न हिमालको आरोहण गरी सकेकाछन् । पर्यटनका माध्यमबाट देशको आर्थिक समृद्धिमा सहयोग पुग्ने विश्वास उनमा छ ।
देश पर्यटनको माध्यमबाट समुन्नत र समृद्धिको दिशामा अघि बढ्न सक्छ भन्ने उन्को भनाई छ । पर्वतारोहीलाई राज्यले पनि सम्मान गर्नुपर्ने उन्को तर्क छ । आरोहणलाई व्यवस्थित र सुरक्षित बनाउन विशेषज्ञबाट तालिमको यथोचित व्यवस्था गरी पूर्ण व्यावसायिक बनाउन आवश्यक छ उन्ले भने ।