पानी नपर्दा खेतीपातीको काम गर्न नपाएका महोत्तरीका किसान गएरातिको वर्षाले जुर्मुराएका छन् । वैशाख मसान्त रातिको वर्षाले खेतबारीको माटोमा पर्याप्त चिस्यान भएपछि अब खेतीपातीका काम अघि बढ्ने आशले किसान जुर्मुराएका हुन् । वर्षाले खेतीपातीसँगै बढेको गर्मीबाट पनि राहत दिएको छ ।

‘यसपालि पूरै हिउँद त्यतिकै पानी नपरी बित्यो, गत चैतमा अलिअलि झारे झुर्रे पानी परे पनि माटो गाल्ने गरी परेको थिएन’, बर्दिबास–६ जुरेटोलका किसान धनसिंह क्याप्छाकीले भने, ‘अब चैँ खेतबारी खनजोत गर्न पाइने भइयो ।’

पूरै हिउँद पानी नपरी बित्दा खेतबारी सुकेर जोत्न नसकिएको बेला अब भने खेतीपातीका काम गर्न पाइने क्याप्छाकीसहितका किसानको विश्वास छ । अब खेतबारी खनजोत गर्ने, बर्खे धान र कोदोको ब्याड राख्ने, बर्खे मकै लगाउने र उखु गोड्न प्रशस्त चिस्यान भएको महोत्तरीको उत्तरी भेगका किसानले बताएका छन् ।

पछिल्लो वर्षाले अब नदी किनारका उकास चउरमा घाँस पलाउने भन्दै केही दिनपछि गाईबस्तुको चरन हुने किसानको भनाइ छ । मध्यरात अघि निकै बेर परेको पानीले बढेको गर्मी पनि घटाएर वातावरण शीतल बनाएको सर्वसाधारणले बताएका छन् ।

वर्षाको पानीले आँप, लिचीसहितका फल बढ्न र पोटिलो हुन सघाउने किसानको विश्वास छ । फलपफुला रुखमा लागेका जालो, हाँगापातका कालो धब्बा वर्षाले पूरै पखालिँदा आँप र लिचीका रुख चहकिला देखिएका छन् ।

अब आँप र लिचीका दाना चाँडै बढ्ने र थप रोग व्याध नलाग्ने विश्वास पलाएको बर्दिबास–९ पशुपतिनगरका किसान शैलदेवी महतोको भनाइ छ । पछिल्लो वर्षाले वैशाखी तरकारीका बेला (लहरा) पनि लहलहाउने र बतिया (चिचिला) हलक्क बढ्ने किसान बताउँछन् ।

अहिलेको वर्षाको पानी त वैशाखी तरकारीका लहरा र बोटलाई अमृत नै भएको भङ्गाहा–४ का तरकारी किसान चन्देश्वर राय दनुवार बताए । यो वर्षाले खुल्ला चउर, कच्ची सडक र हाटबजार क्षेत्रको धुलो भिजाएको हुँदा अब केही दिन धुलो नउड्ने सर्वसाधारण बताउँछन् । राति पानी परेर आज बिहान मौसम उघ्रिँदा काम गर्न थप अनुकूलता भएको किसानहरूको भनाइ छ ।

 

सोमवार, १ जेष्ठ, २०८० गते

Comments

सम्बन्धित खवर

लोकप्रिय

धेरै पढिएको

संघर्षशिल युथ क्लबको दास्रो अधिवेशन सम्पन्न, अध्यक्षमा डुबा भोटे

किमाथांका नाका खोल्न परराष्ट्र मन्त्री साउदसँग सांसद दिपक खड्काको माग

संखुवासभाका अन्तराष्ट्रिय पदक विजेता नेपाली धावक निमेश गुरुङ सम्ममानित

राबा बैकको लोगोसंगै कार्यकारी प्रमुख किरण श्रेष्ठको तस्वीरले चुम्यो अफ्रिकाको चुचुरो

बर्दिवासको घाम बोलको गितमा गायक वाङछिरीङ भोटियाको अर्को सफलता

चुनौतिसंगै लाक्पा शेर्पा अर्को कीर्तिमान राख्न सातौ पटक मकालु हिमालको आरोहणमा

अन्तरपालिका स्तरिय फुटसल प्रतियोगिताको उपाधि धर्मदेबीलाई

प्रधानमन्त्रीसंग किम्माथांका नाका खोल्न माग गरेका छौ : वाङछेदर भोटे

किमांथाका नाका यहि सेप्टेम्बरबाट खुल्ने अध्यक्ष वाङछेदर भोटेको खुलासा

आठ पटक सगरमाथा चढेका ज्याम्चाङ भोटेले हिमालबारे कीन भने यस्तो !