बाँझो जग्गामा खेती गर्ने कृषकलाई प्रोत्साहनस्वरूप अनुदान

स्याङ्जाको फेदीखोला गाउँपालिकाले बाँझो जग्गामा खेती गर्ने कृषकलाई प्रोत्साहन गर्ने भएको छ । पालिकाले बालीअनुसार न्यूनतम क्षेत्रफलमा खेती गर्ने कृषकलाई प्रोत्साहनस्वरूप अनुदान दिन लागेको हो ।

गाउँपालिकाभित्रका बाँझो रहेको जग्गा न्यूनीकरण गर्ने उद्देश्यअनुरूप दुई वर्षदेखि बाँझो रहेको खेतबारीमा खेती गर्ने कृषकहरूलाई प्रोत्साहनस्वरूप अनुदान दिन लागिएको कृषि विकास शाखाले जनाएको छ ।

पालिकाका अनुसार धान खेतीमा अनुदान पाउन न्यूनतम् २ रोपनी जग्गामा खेती गर्नुपर्ने छ । जसमा आफ्नै जग्गा भए पालिकाले प्रति २ रोपनीको ४ हजार रुपैयाँ र भाडामा लिएको भए प्रति २ रोपनीका ५ हजार रुपैयाँ अनुदान दिने बताइएको छ । यस्तै कोदो, मकै, दलहन र तरकारीका लागि भने कम्तीमा १ रोपनी जग्गामा खेती गर्नुपर्ने छ ।

कोदो र मकैका लागि आफ्नै जग्गा भए प्रति १ रोपनी २ हजार रुपैयाँ र भाडामा भए २ हजार ५ सय रुपैयाँ अनुदान उपलब्ध गराइने भएको छ । त्यसैगरी दलहन वा तरकारीमा आफ्नै जग्गा भए प्रति १ रोपनीको २ हजार र भाडामा लिएको भए २ हजार ५ सय रुपैयाँ दिइने छ ।

ईच्छुक कृषकहरूलाई सम्बन्धित वडा कार्यालयमा वैशाख १० गतेभित्र निवेदन पेश गर्न पालिकाले अनुरोध गरेको छ ।