उद्योग वाणिज्य महासंघको केन्द्रीय सदस्यमा खुमबहादुर सुवेदीको उम्मेदवारी

पर्यटन व्यवसायी खुमबहादुर सुवेदी नेपाल उद्योग वाणिज्य महासंघको आसन्न निर्वाचनमा केन्द्रीय सदस्यमा उम्मेदवारी दिने भएका छन् । पर्वतीय पर्यटन व्यवसायीहरूको छाता संगठन, ट्रेकिङ एजेन्सीज एसोशिएसन अफ नेपाल (टान)का निवर्तमान अध्यक्ष समेत रहेका सुवेदीले यही चैत्र २८ र २९ गते हुने साधारण सभामा उम्मेदवारी दिन लागेका हुन् । व्यवसायी सुवेदीले वरिष्ठ उपाध्यक्षका प्रत्याशी अञ्जनकुमार श्रेष्ठ र उपाध्यका उम्मेदवार मनिषलाल प्रधानको प्यानलबाट उम्मेदवारी दिन लागेका हुन् ।

को हुन् सुवेदी ?

२०४९ सालमा ट्रेकिङ गाइड हुँदै पर्वतीय पर्यटन क्षेत्रमा प्रवेश गरेका सुवेदी सफल युनिक एडभेन्चर इन्टरनेसनल प्रा.लि., ट्रिपल ए होलिडेज् र ट्रिपल ए टान्सपोर्ट्का प्रबन्ध निर्देशक समेत हुन् ।

सुवेदी सामाजिक संस्था लायन्स क्लब अफ नेपाल प्याराडाइजको अध्यक्ष, रोटरी क्लब अफ दरबारमार्गका सदस्यका समेत रहेका छन् । सुवेदीले नेपाली पर्यटन प्रवद्र्धनार्थ ४० भन्दा बढी देशहरुको भ्रमण गरिसकेका छन् । उनी सामाजिक सेवामा कृयाशिल ह्यान्ड इन ह्यान्ड नेपालका अध्यक्षसमेत हुन् ।

टानको वरिष्ठ उपाध्यक्ष, कोषाध्यक्ष र अध्यक्ष भएर काम गरिसकेका उनी पर्यटन व्यवसायीमात्रै होइन नियात्राकारसमेत हुन् । ‘पदयात्राका पाइलाहरु’ र ‘बेल्जियमका क्षणहरु’ सुवेदीका दुई नियात्रा कृति हुन् । विभिन्न राष्ट्रिय तथा अन्तर्राष्ट्रिय सम्मानहरुबाट सम्मानित भइसकेका उनी धादिङ, ज्वालामुखीमा जन्मेका हुन् ।

सुवेदीले व्यवसायी र राज्यलाई थुप्रै योगदान दिइसकेका छन् । सुवेदी नेपाल सरकारद्वारा प्रबल जनसेवा श्री मानपदवीबाट विभूषित समेत भएका छन् । पर्यटन र सामाजिक क्षेत्रमा सुवेदीले दिएको योगदानको कदर गर्दै सरकारले विभूषित गरेको हो ।

उद्योगी हकहितमा तत्पर

पर्यटन क्षेत्रको प्रतिनिधित्व गर्दै उम्मेदवारी दिन लागेपनि महासंघमा गएपछि सबै क्षेत्रका उद्योगी व्यवसाय र व्यवसायीहरूको हकहितमा काम गर्ने सुवेदीले बताएका छन् ।

‘नेपाल उद्योग वाणिज्य महासंघ नेपालको उद्योग वाणिज्य क्षेत्रमा संलग्न उद्यमी तथा व्यवसायीहरूको पेशागत हकहित संरक्षण एवम् उद्योग वाणिज्य क्षेत्रको विकासमा सहयोग पु¥याउने ठुलो र साझा संस्था हो’ सुवेदीले भने, ‘सबै क्षेत्रका उद्योगी व्यवसायीहरूको हकहितको संरक्षण, उद्योग व्यवसायको विकास र विस्तारमा केन्द्रित भएर काम गर्ने छु ।’

नेपाल उद्योग वाणिज्य महासंघ मुलुकको अर्थतन्त्रको मेरुदण्ड भएकाले यसले सक्षम र समर्पित नेतृत्व पाउनुपर्ने सुवेदीको भनाइ छ । ट्रेकिङ एजेन्सीज एसोशिएसन अफ नेपाल (टान) लगायत विभिन्न संघसंस्थाको नेतृत्व गरेर कुशलता र समर्पण प्रदर्शन गरिसकेकाले महासंघको सदस्यमा पनि आफ्नो जीत अनिवार्य रहेको सुवेदीले बताए ।

‘टानमा मैले दुई वर्षभन्दा बढी नेतृत्व गरेँ । मैले आफ्नो व्यवसायलाई छोडेरै टानलाई समय दिएको थिएँ । महासंघमा पनि पुरा समय दिएर काम गर्ने छु ।’ सुवेदीले भने । पर्यटन क्षेत्रका सम्पूर्ण व्यवसायीहरूको साथ–समर्थन रहेको र व्यावसायिक, सामाजिक तथा राजनीतिक क्षेत्रमा आफूले पु¥याउँदै आएको योगदानलाई मूल्याङ्कन गर्दै आफूलाई महासंघको सदस्यमा निर्वाचित गराउने सुवेदीको विश्वास छ ।