पाँचथरको फालेलुङमा छैटौँ चौँरी महोत्सव हुने

पाँचथरको फालेलुङ गाउँपालिकामा छैटौँ फालेलुङ चौँरी पर्यटन महोत्सव चैत ३० देखी वैशाख २ गते  हुने भएको छ ।

महोत्सव पाँचथरको उत्तरी फालेलुङ गाउँपालिकाको चाररातेमा हुने भएको छ । भारतको सिमाना नजिक रहेको यो महोत्सव नयाँ वर्षमा आयोजना हुन लागेको हो ।  विश्वमै लोपोन्मुख चौँरी संस्कृतिको जगेर्ना गर्नु , उच्च पहाडी क्षेत्रको पर्यावरण सन्तुलन कायम गर्न ,विश्वमै लोपोन्मुख रेडपाण्डा र जैविक विविधताको संरक्षण गर्नु महोत्सवको मुख्य उद्देश्य रहेको फालेलुङ गाउँपालिका उपाध्यक्ष महेन्द्रहाङ जवेगुले बताउनुभयो ।

महोत्सवमा चौँरी र चौरीजन्य उत्पादनको प्रदर्शनी, गोठ पर्यटनको प्रवद्र्धन, उच्च पहाडी क्षेत्रको अवलोकन, सांस्कृतिक कार्यक्रम राखिएको छ । फुटबल प्रतियोगिता समेते हुने भएको  छ । अग्लो स्थानमा हुने प्रतियोगितामा १६ टिमको सहभागी हुने बताइएको छ । महोत्सवले गोठ स्टेलाई प्रवद्र्धन गर्ने छ ।

फालेलुङ गाउँपालिको आर्थिक सहयोगमा हुने महोत्सवमा चौँरी तथा याकको प्रजातिहरूको संरक्षण र संवद्र्धनमा सहयोग पुग्ने पत्रकार सम्मेलन गर्दै आयोजकले जनाएको छ । महोत्सवलाई आकर्षण गर्न फालेलुङ क्षेत्रमा पाइने जडीबुटीहरू , स्थानीय संस्कार संस्कृति झल्कने परिकारहरू, भेडाको उनबाट निर्मित सामाग्रीहरूको बिक्री, गोठस्टेको अनुभव , पुरुष फुटबल प्रतियोगिता, नृत्य प्रतियोगिता लगायतको आकर्षण रहने आयोजकले जनाएको  छ ।

महोत्सव सहरी विकास मन्त्री सिता गुरुङको प्रमुख अतिथ्यतामा हुने भएको छ । महोत्सवका लागि आवश्यक तयारी अगाडी बढाइएको फालेलुङ कञ्चनजङ्घा पर्यापर्यटन प्रवद्र्धन संस्था, दिपज्योती युवा क्लबले जानकारी दिएको छ ।