राष्ट्रपति पौडेलद्धारा सडक खाली नगरी बसन्तपुरस्थित कुमारीको दर्शन

सर्वसाधारणलाई रोकटोक नगरी राष्ट्रपति रामचन्द्र पौडेल काठमाडौंको बसन्तपुरस्थित कुमारी घर पुग्नु भएको छ । बसन्तपुरस्थित जीवित देवी कुमारीको दर्शन गर्न उहाँ बसतपुर पुग्नु भएको हो । त्यहाँ सवारी हुँदा सवारीसाधन, सर्वसाधारण कसैलाई रोकिएको थिएन ।

सवारी गरेसँगै उहाँले यसअघिको परम्परालाई तोड्नु भएको छ । राष्ट्रपतिको सवारी हुँदा यसअघि सर्वसाधारणलाई रोक्ने गरिन्थ्यो । जसले गर्दा सडक जाम हुँदा नागरिकले दुःख पाउदै आएका थिए । र राष्ट्रपतिको आलोचना हुने गरेको थियो ।

कुमारीको दर्शनपछि राष्ट्रपति पौडेलले प्रसाद ग्रहण गर्नुका साथै कुमारी घरमा चियापान गरेर फर्कनु भएको थियो । यसअघि राष्ट्र प्रमुखले कुमारी घरमा चिया पिउने चलन थिएन । राष्ट्रपति पौडेलले आफू निर्वाचित हुनुअघि नै सवारी जाम नगर्ने बताउनुभएको थियो ।

राष्ट्रपति पौडेललाई कुमारी घरका प्रमुख गौतमरत्न शाक्य, प्रतिनिधिसभा सदस्य सपना राजभण्डारी, प्रदेशसभा सदस्य शैलेन्द्रमान बज्राचार्य लगायतले स्वागत गर्नु भएको थियो । राष्ट्रध्यक्ष भएपछि जीवित देवी कुमारीको दर्शन गर्न जाने परम्परा अनुसार राष्ट्रपति पौडेल कुमारीको दर्शन गर्न जानु भएको हो ।

जाम नगरी र सडक खाली नगरी राष्ट्रपति पौडेल शितल निवास फर्कनु भएपछि नागरिकले जामबाट मुक्ती पाउने बिश्वास गरेका छन् ।