कपिलवस्तुमा संसारकै अग्लो बुद्धको मूर्ति बन्दै

कपिलवस्तुमा संसारकै अग्लाे (२४५ मि.) बुद्धकाे मूर्ति बन्ने भएकाे छ । कपिलवस्तु नगरपालिकाभित्र बुद्धको मूर्तिसहित पार्क निर्माणका लागि समझदारी पत्रमा हस्ताक्षर गरिएको छ । समझदारी पत्रमा अन्तर्राष्ट्रिय बौद्धिष्ट सेन्टरका प्रमुख चोइङ क्विइ सेङ स्टेवार्ड, सेन्टरका नेपाल प्रतिनिधि मोहन गौतम र कपिलवस्तु नगरपालिकाका नगरप्रमुख सुदीप पौडेलले हस्ताक्षर गरेका छन् ।

जसमा कपिलवस्तु नगरपालिकाले बुद्धको प्रतिमा बनाउने ठाउँ, प्रतिमाको साइज पहिचान गरी कार्यपालिकाले पारित गर्नेछ र नेपालको प्रचलित कानुन अनुसार सम्बन्धित सरकारबाट सम्बन्धन लिइनेछ । त्यस्तै ठाउँ निश्चित भएपछि इन्टरनेशनल बुद्विष्ट सेन्टरले आर्थिक प्रस्तावना तयार पार्ने गरी समझदारी पत्रमा हस्ताक्षर भएको हो ।

कार्यक्रममा लुम्बिनी प्रदेशका स्वास्थ्यमन्त्री विष्णु पन्थीले विश्वकै ठूलो बुद्व मूर्तिले विश्वकै ध्यान तान्ने बताए । परियोजनाले सिगो लुम्बिनी प्रदेशका लागि  कोसेढुङगा साबित हुने बताए । उनले परियोजनाले कपिलवस्तुवासीहरूलाई आम्दानीसँग पनि जोड्न सक्ने बताए । साथै परियोजनाका लागि विदेसी उत्साहका साथ लाग्नुभएको उनको भनाइ छ । परियोजना सफल बनाउन प्रदेश सरकारले समेत अपनत्व लिने मन्त्री पन्थीले बताए ।

सेन्टरका प्रमुख चोइङ क्विइ सेङ स्टेवाडले सहमति पत्रमा हस्ताक्षर भएको दिनलाई महत्त्वपूर्ण दिन र काम भएको बताए । प्राचीन कपिलवस्तुमा बुद्धको मूर्ति निर्माणको काम गर्न पाउँदा आफूलाई निकै खुसी लागेको उनले बताए ।

सो अवसरमा बोल्दै चिनिया धर्मगुरु छ्याङ पिङले पावन भूमिमा आउन पाउनु निकै खुसी महसुस भएको बताए । कपिलवस्तु नगरपालिकामा कनकमुनि र क्रकुछन्द बुद्धको जन्मस्थल भएकोले यो भूमि निकै नै महत्त्वपूर्ण रहेको उनले बताए । यस परियोजनाले चीन र नेपालको सम्बन्धलाई अझै प्रगाढ बनाउने उनले बताए । उनले भने  “कमलको फूल झैँ बुद्धको ज्ञान संसारभर नै फैलिएको छ ।”

विश्वको सबैभन्दा ठूलो मूर्ति नगरमा बन्ने भएपछि गर्वको विषय रहेको नगरप्रमुख सुदीप पौडेलले बताए । लुम्बिनी आउने पर्यटकहरू मूर्ति हेर्न यहाँ आउने नै हुने छन् भन्ने विश्वास लिएको उनले बताए । पर्यटकको सङ्ख्या बढेपछि पक्कै नै यस क्षेत्रको सामाजिक, आर्थिक उन्नति हुने उनको भनाइ छ ।