घार खोलाकाे काम ९७ प्रतिशत सकियाे, चैतभित्र उत्पादन परीक्षण सुरु हुने

म्याग्दी हाइड्रो पावर कम्पनीले निर्माण गरिरहेको १४ मेगावाटको घार खोला जलविद्युत आयोजनाको काम ९७ प्रतिशत सकिएको छ । कम्पनीले म्याग्दी जिल्लाको घारखोलामा २०७५ साल देखि निर्माण सुरु गरेको उक्त आयोजनाको काम अन्तिम चरणमा पुगेको हो ।

निर्माणाधीन आयोजनाको सिभिल संचनाको काम ९९ प्रतिशत सकिएको आयोजना प्रमुख विनोद देवकोटाले बताउनुभयो । ‘आयोजनको बाँध र टनेलको सिभिल संरचनाको काम सकिएको छ’ उहाँले भन्नुभयो, ‘अहिले सुरुङको अन्तिम चरणको काम भईरहेको छ, बाँकी काम १० दिनभित्र सकिनेछ ।’

विद्युतगृहको सिभिल संरचनाको काम पुरा गरी मुख्य उपकरण जडानको काम भइरहेको कम्पनीले जनाएको छ । प्रसारण लाइनको काम पनि अन्तिम चरणमा पुगेको छ । आगामी चैतभित्रमा उत्पादन परीक्षण सुरु गर्ने लक्ष्यका साथ धमाधम कामहरू अघि बढीरहेको छ ।

आयोजनाको सबै काम पुरा गरेर चैतभित्र उत्पादन परीक्षण सुरु गर्ने लक्ष्य रहेको देबकोटाले बताउनुभयो ।आयोजनाबाट उत्पादन हुने विद्युत ३३ केभी प्रसारणा लाइनमार्फत ८ किलोमिटर दुरीमा रहेको नेपाल विद्युत प्राधिकरणको दाना सबस्टेनमा जोडिनेछ । सबस्टेसनमा सिभिलको काम सकिएर उपकरण जडानको काम भइरहेको छ ।

४ वर्ष अघिदेखि निर्माण सुरु भएको आयोजनाबाट यसअघि नै विद्युत उत्पादन सुरु गर्ने तालिका थियो । तर, भौगोलिक विकटता, कोरोनाको जोखिम, युक्रेन र रसियाको युद्धले इलोक्ट्रोमेकानिकल उपकरण आयातमा प्रभावलगायत विविध कारणले तालिका सरेको देवकोटाले बताउनुभयो । पछिल्लो तालिका अनुसार आयोजनाबाट २०७९ चैतभित्र विद्युत उत्पादन गर्नुपर्नेछ ।