किसानलाई क्षतिपूर्ति दिन फोर एचको माग

फोर एच नेपालले घाटामा रहेका किसानलाई न्यूनतम बजार मूल्य निर्धारण गरी उचित क्षतिपूर्तिको माग गरेको छ । नेपाली किसानलाई पूर्ण अनुदान तथा व्यावसायिक किसानलाई सहुलियत दरमा ऋण उपलब्ध गराउनुपर्ने माग राख्दै फोर एच नेपालले सरकारको ध्यानाकर्षण गराएको हो ।

चितवनका किसानले आफूले उत्पादन गरेको तरकारीले उचित बजार मूल्य नपाएपछि तरकारी सडकमा फालेर विरोध जनाएको एक हप्ता पुग्दा पनि सरकारले कुनै पहल कदमी नगरेको फोर एच नेपालले प्रेस विज्ञप्तिमार्फत जनाएको छ ।

फोर एच नेपालका अध्यक्ष लोकराज अवस्थीद्वारा जारी विज्ञप्तिमा भनिएको छ, ‘किसानका मागप्रति नेपाल सरकारले चासो नदेखाउनुले सरकार किसानप्रति कति संवेदनशील छ भन्ने कुराको पुष्टि भएको छ । पीडित किसानका माग तत्काल पूरा गरी नेपाली किसानले उत्पादन गरेका वस्तुको न्यूनतम मूल्य निर्धारण गरिनुपर्छ ।’

विदेशबाट आयात गरिएका तरकारी सस्तो मूल्यमा बजारमा उपलब्ध हुने गरेका कारण नेपाली किसानले उत्पादन गरेका तरकारीले बजार पाउन नसकेको अवस्थीले बताएका छन् । साथै नेपाली किसानको लागत मूल्य बढी हुनु, बजारसँग सिधै पहुँच नहुनु र बिचौलियाका कारण किसानले कम मूल्य पाउने गरेका छन् । सरकारले बिचौलियालाई नियन्त्रण गर्न नसकेको र सरकारी बजार मूल्य निर्धारण प्रणाली प्रभावकारी नभएको अवस्थीद्वारा जारी विज्ञप्तिमा भनिएको छ ।

‘नेपाली कृषि क्षेत्र, कृषि उत्पादन तथा कृषि बजारीकरणबारेमा नेपाल सरकारसँग आवश्यक तथ्यांक, आवश्यकताको पहिचान तथा व्यवस्थापन प्रणालीसम्बन्धी एकिृकत नीति, योजना तथा कार्यक्रमको अभावले कृषिसम्बन्धी समस्याको दिगो समाधान हुन नसकेको हो ।’ विज्ञप्तिमा भनिएको छ । विदेशबाट कति आयात गर्ने र नेपाली किसानले उत्पादन गरेको उत्पादनले कति बजार धान्न सक्छ भन्ने कुराको एकिन नहुनुले किसान मारमा परेको जनाइएको छ । समस्या समाधानका लागि तत्काल एक अधिकारसम्पन्न उच्चस्तरीय समिति गठन गर्न पनि सरकारसँग माग गरेको छ ।

फोर एच नेपाल एक दशकदेखि कृषिमा युवा सहभागिता तथा कृषि क्षेत्रमा काम गर्दै आइरहेको छ ।