चारसय किसानलाई स्याउका बिरुवा वितरण

जुम्लाको तातोपानी गाउँपालिका वडा नं १ राँका गाउँका किसानलाई स्याउका बिरुवा वितरण गरिएको छ । बिरुवा रोप्ने समय नजिकिए सँगै तातोपानीले राँका गाउँका चार सय किसानलाई स्याउका बिरुवा वितरण गरिएको तातोपानी गाउँपालिका कृषि शाखा प्रमुख पदम नेपालीले बताउनुभयो ।

उहाँका अनुसार  प्रति किसानलाई १५ वटा बिरुवाका दरले चार सय किसानलाई ६ हजार ५ सय बिरुवा वितरण गरिएको हो । जुम्ली रैथाने ‘डेलिसियस’ जातका बिरुवा वितरण गरिएको छ । बिरुवा सँगै खेतीबारे ज्ञान तथा रोग किरा नियन्त्रण सम्बन्धी अभिमुखीकरण गराइने कृषि शाखा प्रमुख नेपालीको भनाई छ ।

जुम्ली किसानको मुख्य आयस्रोत स्याउ खेती हो । तातोपानी गाउँपालिका अध्यक्ष नन्दप्रसाद चौलागाँईले भन्नुभयो,“तातोपानीमा स्याउ खेतीको सम्भावना  राम्रो छ । स्याउ खेतीमा किसानको बढ्दो आकर्षण लाई मध्यनजर गरि अनुदान बिरुवा वितरण गरेका छौ । स्याउ खेती विस्तारमा पालिकाले थप सहयोग पनि गर्ने छ ।”

तातोपानी गाउँपालिकाले कृषि क्षेत्रलाई विशेष प्राथमिकता दिएर आफ्ना कार्यक्रमहरू अघि बढाएको प्रमुख प्रशासकीय अधिकृत तिर्थ बहादुर कठायतले बताउनु भयो । तातोपानी १ नम्बर वडाध्यक्ष कर्ण बहादुर कठायतले अनुदानमा पाएका बिरुवाबाट उत्कृष्ट कृषि कर्म गरेर देखाउने विश्वास व्यक्त गर्नुभयो ।

स्याउ खेती गर्ने समय नजिकिँदै गर्दा पालिकाले निःशुल्क बिरुवा दिएपछि राहतसँगै स्याउ खेतीमा लाग्ने जाँगर पैदा भएको राँका गाउँका किसान कल बहादुर कठायतले बताउनु भयो । अनुदानमा बिरुवा पाएपछि खुसि हुनु भएका किसान परान धराला व्यवसायीक स्याउ खेतीमा होमिने सङ्कल्प गरेको बताउनुहुन्छ ।