पोल्ट्री उद्योगलाई सबल र आत्मनिर्भर बनाउन सरकारको पूर्ण सहयोगः प्रधानमन्त्री

प्रधानमन्त्री पुष्पकमल दाहालले पशुजन्य खाद्यपदार्थ र वनस्पतिजन्य खाद्यपदार्थको महत्त्वबारे चर्चा  गर्नु महत्त्वपूर्ण भएको बताउनुभएको छ ।

नेपाल भेटेरिनरी एशोसिएसनको आयोजनामा शनिबार दशरथ रंगशालामा सम्पन्न राइट टु प्रोटिन हाफ म्याराथनु प्रतियोगिताको समापन समारोहमा बोल्दै प्रधानमन्त्री दाहालले पोषणको महत्त्वबारे जनचेतना फैलाउने कार्यमा नेपाल सरकारका पहल पर्याप्त नभएको बताउनुभयो ।

अबका दिनका पशुजन्य खाद्यपदार्थ र वनस्पतिजन्य खाद्यपदार्थमा देशलाई आत्मनिर्भर बनाउन सरकार लाग्ने उहाँले बताउनुभयो । स्वास्थ्यको क्षेत्रमा सरकारले नयाँ सुरुवात गर्ने तयारी गरेको प्रधानमन्त्री दाहालले बताउनुभयो ।

नेपाल भेटेरिनरी एशोसिएसनको आयोजनामा शुक्रबार सम्पन्न राइट टु प्रोटिन हाफ म्याराथनु प्रतियोगितामा विजेताहरूलाई पुरस्कार वितरण गरिएको छ । दिपक अधिकारी र फुलमती रानाले दोस्रो संस्करणको राइट टु प्रोटिन रन हाफ म्याराथनको उपाधि जितेका छन् । नेपाल भेटेरिनरी एसोसिएसनले आयोजना गरेको राइट टु प्रोटिन रन हाफ म्याराथनमा शनिबार दीपकले पुरुषतर्फ र फुलमतीले महिलातर्फको उपाधि जितेका हुन् ।

दशरथ रंगशालाबाट सुरु भएको म्याराथन दौडमा ५ हजारभन्दा बढी प्रतियोगीको सहभागिता रहेको भेटेनरी एशोसिएसनका अध्यक्ष डा। शीतलकाजी श्रेष्ठले जानकारी दिनुभयो ।

खुला हाफ म्याराथन महिला र पुरुष, पुरुष १० किमी खुला, महिला ५ किमी खुला, १२ कक्षासम्मका विद्यार्थीलाई ५ किमी पुरुष र ३ किमी महिला तथा फरक क्षमता भएका महिला र पुरुषहरूका लागि ह्वीलचेयर म्याराथन दौड प्रतियोगिता गराइएको थियो ।

प्रतियोगितामा सबैभन्दा कम उमेरका सहभागीमा ६ वर्ष र सबैभन्दा बढी उमेरमा ७२ वर्षका रहेका थिए ।

प्रतियोगिताको कूल पुरस्कार रकम १४ लाख ८३ हजार ३ सय ३३ रुपैयाँ रहेकामा हाफ म्याराथनको उपाधि जित्नेले १ लाख ३३ हजार ३ सय ३३ रुपैयाँ प्राप्त गरेका छन् भने पाँचौँ स्थानसम्मका खेलाडीलाई नगद पुरस्कारको व्यवस्था गरिएको थियो ।