पनौतीको माटोमा ६१ प्रतिशत अम्लियपन

पनौती नगरपालिका भित्र गरिएको माटो परीक्षणमा अत्याभिक अम्लिएपन पाइएको छ । नगरभित्रका चार सय ६१ कृषकको खेतबारीमा गरिएको परीक्षणमा ६१ प्रतिशत माटोमा अम्लियपन भएको पाइएको हो ।

प्रदेश राजधानी हेटौँडास्थित माटो तथा मल परीक्षण प्रयोगशाला तथा पनौती नगर कृषि तथा पशुपक्षी शाखाको संयुक्त आयोजनामा माटो परीक्षण गरिएको होे ।

प्रयोगशालाका विज्ञ डा. जनार्दन खड्काले पनौतीको माटोमा अत्यधिक अम्लियपना देखिएकाले यसलाई समस्याग्रस्त माटोका रुपमा लिइएको बताउनुभयो ।

पनौतीको माटोको अम्लियपना कम गर्न प्रयोशालामार्फत् २१ मेट्रिक टन कृषि चुन उपलब्ध गराइने खड्काले जानकारी दिनुभयो । खड्काका अनुसार प्रयोगशालाले समस्याग्रस्त माटो सुधार गर्न ‘भकारो सुधार’ कार्यक्रम सञ्चालन गरिने योजना बनाएका छ ।

बाग्मती प्रदेशअन्तर्गत काठमाडौँको दक्षिणकाली नगर, काभ्रेपलाञ्चोकको पनौती, चितवनको खैरेनी नगर, भक्तपुरको चाँगुनारायण नगर र ललितपुरको महाङ्काल गाउँपालिकामा भकारो सुधार कार्यक्रम सञ्चालनमा ल्याउने भएको छ । खड्काका अनुसार छनोट भएका पाँच स्थानीय तहमा जैविक मल प्रयोग गर्ने ५० कृषकका लागि रु १५ हजार अनुदानसमेत दिइनेछ ।