मध्यमर्स्याङ्दीमा जलबिद्युत उत्पादन घट्दो

मध्यमर्स्याङ्दी जलविद्युत आयोजनाको विद्युत उत्पादन घट्न थालेको छ ।

आयोजनामा आवश्यक पानी कम हुँदै गएपछि विद्युत उत्पादन घट्न थालेको हो । बेँसीशहर नगरपालिका–१ दलाल स्थित ७० मेगावाट क्षमताको मध्यमर्स्याङ्दी जलविद्युत केन्द्रमा कूल क्षमताभन्दा करिब २१ मेगावाट विद्युत उत्पादन घटेको छ ।

मर्स्याङ्दी नदीमा पानी कम हुन थालेसँगै आयोजनाको विद्युत घट्दा दैनिक ४८–४९ मेगावाटको हाराहारीमा बिजुली उत्पादन भइरहेको केन्द्रका प्रमुख पवन बस्नेतले जानकारी दिनुभयो । एक महिनाअघि सम्म नदीको पानी बढी भएर खेर जान्थ्यो तर अहिले सबै पानी प्रयोग गरे पनि उत्पादन घटिरहेको उहाँको भनाई छ । ३५–३५ मेगावाट क्षमताको दुईवटा टर्बाइन गरी ७० मेगावाट क्षमताको आयोजना हो । आगामी फागुन महिनाको अन्तिमसम्म पुग्दा विद्युत उत्पादन निकै कम हुने आयोजनाले जनाएको छ । विगतका वर्षहरुमा विद्युत उत्पादन घटेर २६ मेगावाटसम्म पुग्ने गरेको थियो ।

यसबाहेक जिल्लामा विद्युत उत्पादन थालेका झण्डै आधा दर्जन आयोजनाहरुमा समेत बिजुली उत्पादन घट्ने क्रममा रहेको छ । मर्स्याङ्दी गाउँपालिकास्थित भुलभुलेमा रहेको ५० मेगावाट क्षमताको माथिल्लो मर्स्याङ्दी ‘ए’ जलविद्युत आयोजनाको विद्युत उत्पादन पनि घट्ने क्रममा रहेको आयोजनाले जनाएको छ ।

त्यस्तै, २७ मेगावाट क्षमताको दोर्दी जलविद्युत आयोजना, २५ मेगावाट क्षमताको माथिल्लो दोर्दी ए आयोजना, पाँच मेगावाटको सिउरी, ४.४ मेगावाटको राँधी, तीन मेगावाटको मिदिम करापु र दुई मेगावाटको छ्याङ्दी आयोजनाबाट पनि बिजुली उत्पादन कम हुने क्रममा रहेको बताइएको छ ।