हिमाचलको नयाँ मुख्यमन्त्री ‘सुखविन्दर सिंह’ले सपथ

भारतको हिमाचल प्रदेशका नयाँ मुख्यमन्त्री सुखविन्दर सिंह सुखुले सपथ लिएका छन् । उनले आइतबार दिउँसो १ः५० बजे राज्यको १५औँ मुख्यमन्त्रीको रुपमा सपथ लिएका हुन् ।

सपथग्रहण समारोहमा राहुल गान्धी, प्रियंका गान्धी र कांग्रेस अध्यक्ष मल्लिकार्जुन खर्गे पनि उपस्थित थिए । प्रियंकाले मुख्यमन्त्री पदको दावेदार प्रतिभा सिंहलाई आफ्नो छेउमा बसाइन् ।

सखुले कांग्रेसका सबै विधायकहरू सहित मञ्चबाट समर्थकहरूलाई अभिवादन गरे । रिज मैदानमा राज्यपाल राजेन्द्र विश्वनाथले सुखु र उपमुख्यमन्त्री मुकेश अग्निहोत्रीलाई सपथ गराएका थिए । सपथ समारोहमा प्रतिभा सिंहलाई निम्तो दिन बिहान सखु आफैं आएका थिए । सुखुले भने– ‘पार्टी पहिले, मुख्यमन्त्री पछि । प्रतिभा सिंह मेरो आइडल हुन् ।’

मुख्यमन्त्री सुखविन्द सिंह सुखु चौथो पटक र मुकेश अग्निहोत्री पाँचौ पटक विधानसभामा पुगेका छन् । यसअघि, सुखु कांग्रेसको प्रदेश अध्यक्ष, एनएसयूआईका अध्यक्ष, शिमलामा एमसीको दुई पटक नगरसेवक, युवा कांग्रेस प्रमुख र २०२२ मा चुनाव प्रचार समितिको अध्यक्ष निर्वाचित भएका थिए ।

विधानसभा चुनावमा कांग्रेसले ६८ सिटमध्ये ४० सिट जितेको छ भने भारतीय जनता पार्टी (भाजपा) २५ सिटमा सिमित भएको छ ।