Trending
Sunday, June 15, 2025
नेपाली कांग्रेस गण्डकी प्रदेश सभापतिमा शुक्रराज शर्मा निर्वाचित हुनुभएको छ । आइतबार बिहान सकिएको मतगणनाअनुसार वरिष्ठ नेता रामचन्द्र पौडेल पक्षका शर्मा सभापति पदमा निर्वाचित हुनुभएको हो ।
शर्माका निकटतम प्रतिद्वन्द्वी सभापति शेरबहादुर देउवा समूहका अर्जुन जोशी पराजित हुनुभएको छ । १ हजार १४६ मत खसेकोमा शर्माले ६ सय १२ मत ल्याउनुभयो । जोशीले ५ सय २८ मत पाउनुभएको थियो ।
सभापतिमा निर्वाचित शर्मा २०४५ देखि २०६१ सम्म कास्की कांग्रेसको सभापति हुनुहुन्थ्यो । उपसभापतिमा देउवा पक्षका मेखलाल श्रेष्ठ बाहेक बाँकी पदाधिकारी शर्मा प्यानलकाले जितेका छन् । पौडेल पक्षबाट उपसभापतिमा कल्पना तिवारी विजयी हुनुभएको छ ।
यस्तै महामन्त्रीमा विष्णु लामिछाने र किरणबाबु श्रेष्ठ विजयी हुनुभएको छ भने सहमहामन्त्रीमा रामचन्द्र जोशी, रमेश पाण्डे र कोपिला रानाभाट निर्वाचित हुनुभएको छ ।
