प्रदेश १ का मुख्यमन्त्री आचार्यले आज विश्वासको मत लिने

प्रदेश १ सरकारका मुख्यमन्त्री भीमप्रसाद आचार्यले शुक्रबार प्रदेशसभामा प्रस्तुत गरेको विश्वासको मत सम्बन्धी प्रस्तावमा आज छलफल हुँदैछ । आफूलाई प्रदेशसभाको विश्वास छ भन्ने प्रस्तावमा छलफल गरी आजै मत विभाजन गर्ने तयारी छ ।

विश्वासको मतमा आज दिउँसो साढे १२ बजेदेखि छलफल तथा मतदान हुनेछ ।

मुख्यमन्त्री आचार्यले विश्वासको मतका लागि असोज २५ गते प्रदेशसभामा प्रस्ताव दर्ता गराएका थिए ।

प्रदेश १ मा नेपाली कांग्रेस, माओवादी केन्द्र, एकिकृत समाजवादी, जसपा र संघिय लोकतान्त्रिक राष्ट्रिय मञ्चले गठबन्धन बनाएका छन् ।

९३ सदस्यीय प्रदेशसभामा हाल ९२ जना सांसदहरु कायम छन् । सत्तारुढ दल नेकपा एमालेसंग सभामुखसहित ४१ सांसद छन् भने सरकारको विपक्षमा रहेका दल नेपाली कांग्रेसको २१, माओवादी केन्द्रको १५, नेकपा एकीकृत समाजवादीको १०, जसपाको ३ र मञ्चको एकजना गरी ५० सांसद छन् । राप्रपा नेपालको एक जना सांसदभने अहिलेसम्म कुनैपनि पक्षमा खुलेका छैनन ।

प्रदेशसभाबाट मुख्यमन्त्रीले विश्वासको मत प्राप्त नगरेको खण्डमा प्रदेश प्रमुखले नेपालको संविधान २०७२ को धारा १६८ ९२० बमोजिमको सरकार गठन गर्न आव्हान गर्नेछन । प्रदेशप्रमुखले आव्हान गरेलगतै नेकपा एकीकृत समाजवादीका संसदीय दलका नेता राजेन्द्र राईको नेतृत्वमा सरकार गठनका लागि दाबी गर्ने विपक्षी गठबन्धनको तयारी छ ।