बाढी-पहिरोपीडितका लागि तत्काल राहत प्याकेज ल्याउँछौं : प्रधानमन्त्री देउवा

प्रधानमन्त्री शेरबहादुर देउवाले बाढी-पहिरोपीडितका लागि सरकारले राहत प्याकेज ल्याउने बताएका छन्।

शुक्रबार कञ्चनपुरको भीमदत्त नगरपालिका–१२ स्थित महाकाली नदीले गरेको कटान क्षेत्रको स्थलगत निरीक्षणपछि आयोजित कार्यक्रममा उनले बेमौसमी बाढीबाट मुलुकभर भएको क्षतिको विवरण संकलन गरेर पीडितलाई राहत र पुनःनिर्माणमा जुट्ने बताएका हुन्।

‘सुदूरपश्चिमका पहाडी जिल्लामा पनि बाढीपहिराले ठूलो क्षति पुर्‍याएको छ‚’ प्रधानमन्त्री देउवाले भने, ‘सीमित स्रोतसाधनका बाबजुत पनि पीडितलाई राहत दिन्छौँ।’

मन्त्रिपरिषद्को निर्णयबाट केही दिनअघि राहत व्यवस्था गरिएको उल्लेख गर्दै प्रधानमन्त्री देउवाले बाढीका कारण प्रदेश १ लगायत देशभरका विभिन्न स्थानमा क्षति पुगेको बताए। प्रधानमन्त्री देउवाले कञ्चनपुरको महाकाली तटीय क्षेत्र र दोधारा–चाँदनीमा विगतमा पनि नदी कटानको समस्या रहेको चर्चा गर्दै कैलाली कञ्चनपुरमा धानबालीमा ठूलो क्षति पुगेको बताए।

निरीक्षणपछि प्रधानमन्त्री देउवालाई जिल्ला सुरक्षा समितिले बाढीको क्षति र वस्तुस्थितिबारे जानकारीसमेत गराएको छ। सुदूरपश्चिमको बाढी-पहिरोको क्षति र पीडितको अवस्था बुझ्न बिहीबार यहाँ आएका प्रधानमन्त्री देउवाले डोटी, बझाङ, बैतडी र डडेल्धुरामा निरीक्षण गरेका थिए। उनले आज कैलालीमा पनि बाढीग्रस्त क्षेत्रको निरीक्षण गर्ने कार्यक्रम रहेको बताइएको छ।

-रासस