च्छोरोल्पामा मोबाइल सेवा सञ्चालन

पर्यटकीय दुर्गम ठाउँ रोल्वालिङ क्षेत्रमा मोबाइल सेवा सुरु भएको छ । रोल्वालिङ क्षेत्रमा ४ हजार ५ सय मिटर उचाइमा रहेको च्छोरोल्पा हिमताल, दूधकुण्डसहित सगरमाथा आरोहीहरुको गाउँ भनेर चिनिने दोलखाको वेदिङ र ना गाउँ पर्छ । मंगलबार साँझ नेपाल टेलिकमको प्राविधिक टोलीले एनटेन जोडेपछि मोबाइल टेलिफोन सेवा सुरु भएको छ ।

मोबाइल सेवा सञ्चालनपछि ना गाउँ पुगेका पर्यटकहरु र स्थानीय हर्षित भएका छन् । जिल्लाको सबैभन्दा विकट गौरीशंकर गाउँपालिका वडा–९ ना गाउँमा नेपाल टेलिकम दोलखाले नमस्ते मोबाइल टेलिफोन सेवा जडान गरेर सञ्चालनमा ल्याएको हो । गौरीशंकर हिमालको फेदीमा रहेको शेर्पा बस्तीमा मोबाइल सेवा जडान गर्नका लागि टावरको लागि आवश्यक सामान भरियामार्फत ढुवानी गरेको थियो ।

ना गाउँमा मोबाइल सेवा सुरु भएपछि रोल्वालिङ क्षेत्र भ्रमणमा जाने हजारौं पर्यटकहरु लाभान्वित हुने भएका छन् । ना गाउँमा टावर राखेर एउटा एन्टेना च्छोरोल्पा ताल तिर र अर्को एन्टेना बेदिङतिर फर्काएको छ । अहिले भोइस सेवा मात्रै चल्ने गरी २ जी सेवा सञ्चालन भएको छ । साँझदेखि सञ्चालन भएकाले कहाँसम्म चल्छ त्यसको परीक्षण बुधबार च्छोरोल्पा, दूधकुण्डसम्म पुग्ने टेलिकमका टिममा ना गाउँ पुगेका मनिस महर्जनले जानकारी दिए ।

अब बेदिङको टावरले नभेटेको ठाउँमा नाको टावरले भेट्ने उनले बताए । २०७२ को विनासकारी भूकम्पअघि ७२ घरधुरी भएको ना र वेदिङमा अहिले ८४ घरधुरी रहेको छन् । वेदिङभरिका ८५ जनाभन्दा बढी युवाहरुले सगरमाथाको सफल आरोहण गरी वेदिङलाई आरोहीहरुको गाउँ भनेर चिनाएका छन् । यसबाट वेदिङ अझै पर्यटकीय महत्त्वको क्षेत्र बनेको छ ।

सबैभन्दा छिटो सगरमाथा आरोहीको रुपमा कृतिमान कमाएका दाछिरि शेर्पाले ना र बेदिङमा मोबाइल सेवा चल्नु पर्यटन क्षेत्रको लागि अत्यन्तै खशीको खबर भएको प्रतिक्रिया दिए । ‘अहिले सञ्चार सम्पर्ककै अभावमा रोल्वालिङ क्षेत्रमा पर्यटकहरु घटेका छन्’ उनले भने, ‘मोबाइल चलेमा पर्यटकहरु अहिलेभन्दा धेरै बढ्ने र होटल व्यवसाय फस्टाउने बताए ।’

गौरीशंकर गाउँपालिका वडा–९ का वडा अध्यक्ष निमगेली शेर्पाले मोबाइल सेवा सबै क्षेत्रमा भएपछि पर्यटकहरु बढ्ने बताए । यो वर्षको सिजनमै मोबाइल सेवा सुरु भएको छ । अब खबर आदनप्रदान गर्न सजिलो भएकाले विगतमा जस्तो अलपत्र पर्ने हराउने समस्या पनि नहुने बताए । रोल्वालिङ क्षेत्रमा पर्यटक जाने मुख्य मौसम असोज–कात्तिक महिना हो । वेदिङमा भने १० वर्ष अघि मोबाइल सेवा सुरु भएको थियो ।

अहिले पनि वेदिङ गुम्बामा पूजापाठ गर्न दुई दर्जन बढी विदेशी बसिरहेको सगरमाथा आरोही दावाछिरी शेर्पाले जानकारी दिए । वेदिङ र ना गाउँ बहुचर्चित र जोखिमयुक्त च्छोरोल्पा हिमताल भन्दा तल पर्दछ । विष्फोटनको उच्च जोखिममा रहेको यो हिमताल विष्फोटन भएमा सूचना दिनका लागि अहिले संयुक्त राष्ट्रसंघीय विकास कार्यक्रम (युएनडीपी) ले विभिन्न ठाउँमा साइरन राखेको छ ।

अहिले स्याटालाइट प्रविधिबाट टावर निर्माण गरिएको छ । ना गाउँमा वैकल्पिक ऊर्जा कार्यक्रम, गौरीशंकर गाउँपालिकाको संयुक्त लगानीमा गत वर्ष सोलार प्लान्ट राखेर विद्युतीकरण गरिएको छ । विद्युत र सञ्चार दुवै सेवा भएपछि सबैलाई सहज भएको ना र वेदिङमा होटल व्यवसाय गर्दै आएकी निमबुटी शेर्पाले बताइन् ।