१० महिनामा भित्रिए ९ लाख ४३ हजार विदेशी पर्यटक

सन् २०२५ को जनवरीदेखि अक्टोबरसम्म नेपाल आएका अन्तर्राष्ट्रिय पर्यटकको संख्या ९ लाख ४३ हजार ७१६ पुगेको छ। यो अघिल्लो वर्षको सोही अवधिको तुलनामा ०.३ प्रतिशतले वृद्धि भएको हो। सन् २०२४ मा ९ लाख ४१ हजार २४ विदेशी पर्यटक आएका थिए।

पर्यटन विभागका प्रारम्भिक तथ्यांकअनुसार, यो संख्या सन् २०१९ अर्थात् महामारीपूर्वको आगमनको ९७.७ प्रतिशत पुनरुत्थान हो। सन् २०१९ को जनवरी-अक्टोबर अवधिमा नेपालमा ९ लाख ६६ हजार २३ विदेशी पर्यटक आएका थिए।

कोरोनाभाइरस महामारीका कारण सन् २०२० मा पर्यटक आगमन ७ लाख ८५ हजार ८१९ मा झरेको थियो। त्यसपछि सन् २०२१ मा झनै घट्दै २ लाख २३ हजार ८८७ मा सीमित भएको थियो। तर, सन् २०२२ पछि सुधारको क्रम सुरु भइ ४ लाख ७४ हजार २८४ (२०२२), ९ लाख ४१ हजार २४ (२०२३) हुँदै हाल ९ लाख ४३ हजार ७१६ (२०२५) पुगेको हो।

नेपालले महामारीपछिको पर्यटन पुनरुत्थानमा दक्षिण एसियामै उल्लेखनीय प्रगति गरेको छ। यद्यपि, पछिल्ला महिनामा आगमन दर स्थिर रहँदा वार्षिक वृद्धिदर केवल ०.३ प्रतिशतमा सीमित भएको विभागले जनाएको छ।

यस्तै सन् २०२५ को अक्टोबर महिनामा मात्र १ लाख २८ हजार ४४३ विदेशी पर्यटक नेपाल आएका छन्, जुन अघिल्लो वर्षको अक्टोबर (२०२४) को तुलनामा ३.३ प्रतिशतले वृद्धि भएको हो। यो संख्या महामारीपूर्व सन् २०१९ को अक्टोबर महिनाको आगमनको ९५.८ प्रतिशत पुनरुत्थान हो।