सगरमाथाको तिब्बती मोहडामा फसे एक हजार पर्वतारोही र पदयात्री

सगरमाथाको दुर्गम तिब्बती स्लोपमा आएको हिमआँधीका कारण पहाडको पूर्वी भेगका शिविरहरूमा करिब एक हजार मानिसहरू फसेका छन् । जसको उद्धार प्रयास जारी रहेको बीबीसीले जनाएको छ ।

उक्त क्षेत्र समुद्र सतहबाट चार हजार ९०० मिटरभन्दा माथिको उचाइमा छ । त्यहाँ पुग्ने बाटोमा थुप्रिएको हिउँ हटाउन सयौँ स्थानीय बासिन्दा र उद्धार टोलीहरूलाई परिचालन गरिएको छ ।

रोयटर्स समाचार एजेन्सीका अनुसार, स्थानीय सञ्चार माध्यमहरूले करिब ३५० जनाको उद्धार गरी सुरक्षित रूपमा कुडाङ सानो बस्तीमा पुर्‍याइएको बताएका छन् ।

शुक्रबार साँझदेखि नै भारी हिमपात सुरु भएको थियो । यो क्षेत्र पर्वतारोही र पदयात्रीहरूका लागि लोकप्रिय मानिन्छ ।

कुडाङ पुग्न सफल भएका पदयात्रा समूहका चेन गेसुआङले रोयटर्सलाई भने, “मौसम अत्यन्त चिसो र भिजेको थियो, हाइपोथर्मियाको खतरा थियो ।”

चिनियाँ सरकारी सञ्चार माध्यमका अनुसार, तिब्बतको ब्लू स्काई उद्धार टोलीले भारी हिमपातका कारण पालहरू भत्किएको र केही पदयात्रीहरूमा हाइपोथर्मियाका लक्षण देखिएको भन्दै सहयोगका लागि अनुरोध प्राप्त गरेको जनाएको छ ।

रोयटर्सका अनुसार, टिङ्री काउन्टी पर्यटन कम्पनीले शनिबारदेखि एभरेस्ट रमणीय क्षेत्रको टिकट बिक्री र प्रवेशमा अस्थायी रूपमा रोक लगाएको छ । बीबीसी