एकै दिन दश जना कञ्चनजंघाकाे शिखरमा पुगे

ताप्लेजुङमा रहेको विश्वको तेस्रो तथा नेपालको दोस्रो अग्लो हिमाल कञ्चनजंघा यस सिजनमा १० जनाले सफल आरोहण गरेका छन् ।

८,५८६ मिटर अग्लो कञ्चनजंघा हिमाल सेभेन समिट ट्रेक्स एजेन्सीले सफल आरोण गराएको हो । सो ट्रेक्सका जनरल म्यानेजर थानेश्वर गुरागाईले मे १० अर्थात २७ बैशाख ०८२ दिउँसो २.१५ मिनेटमा १० जनाले सफल आरोहण गरेको बताए ।

आरोहण गर्नेमा ५ नेपाली र ५ विदेशी रहेको म्यानेजर गुरागाईले बताए । विदेशीमा कोसोवो, इरान र बेलायतका नागरिक रहेका छन् । आरोहीहरू फ्लुतुरा ईब्राहिमी, एड्रियन माइकल हेस, अलिरेजा बेहपुर, सइद अल्मेमारी, सेयदमिदरजा हासेमी, लाक्पातेम्बा शेर्पा, ङिमादोर्ची शेर्पा, फुरसोना शेर्पा, ग्यालु शेर्पा र छाङ्वा शेर्पा रहेका छन् । नेपाली र भारतीय सेनाका २३ सहित जम्मा ७० जना आरोहणका क्रममा रहेकोमा १० जनाले भने सफल आरोहण गरेका हुन् ।

उनका अनुसार सेभेन समिट ट्रेक्सबाट ४० जना र अन्य ट्रेकिङ एजेन्सीबाट ३०जना कञ्चनजंघा आरोहणको क्रममा छन् । आरोहण सुरु गर्नुअघि कन्चनजंघामा आठजना शेर्पाको टोलीले आधार शिविरबाट लगभग ८ हजार ४ सय मिटरसम्मको लाइन सुरक्षित गरेको थियो ।