वसन्त ऋतुमा हिमाल आरोहण गर्न, २५ देशका ५० जनाले लिए अनुमति

यस वर्षको वसन्त ऋतुमा नेपालको हिमाल आरोहण गर्न हालसम्म २५ देशमा ५० जना आरोहीले अनुमति लिएका छन् ।

पर्यटन विभागले सार्वजनिक गरेको तथ्याङ्क अनुसार हिजो (मार्च १९) सम्ममा पाँच वटा हिमाल आरोहणका लागि ५० जना आरोहीले अनुमति लिएका हुन् । जसमध्ये ३३ जना पुरुष र १७ जना महिला रहेका छन् ।

आरोहण अनुमति शुल्क बापत एक करोड २८ लाख ९८ हजार नौ सय पचास रुपैयाँ राजश्व सङ्कलन भएको विभागले जनाएको छ ।

अन्नपूर्ण हिमाल (८,०९१ मि.) को आरोहणका लागि सबैभन्दा धेरै ३४ जनाले अनुमति लिएका छन् । पाङ्ग्री गोल्डुङ्बा (६,६२० मि.) को आरोहणका लागि ६ जना, थोरोङ पिक (६,१४४ मि.) को लागि ५ जना, मनासलु (८,१६३ मि.) को लागि ३ जना र सुर्मा सरोवर (६,५२३ मि.) को आरोहणका लागि २ जनाले अनुमति लिएका छन् ।

हालसम्म आरोहण अनुमति लिनेमा सबैभन्दा धेरै दक्षिण कोरियाका (६ जना) रहेका छन् ।

त्यसैगरी अमेरिकाका ५ जना, भारतका, जापान, नर्वेको ४/४ जना, रहेका छन् । बेलायका ३ जना, चीन, फ्रान्स, म्यासिडोनिया, पाकिस्तान रोमानियाका २/२ जना रहेका छन् ।  अन्य देशहरूबाट एक/एक जना रहेका छन् ।