मारवाडी समूदायको होलीले रंगियो भृकुटीमण्डप

मारवाडी समुदायले पनि काठमाडौंको भृकुटीमण्डपमा हर्षोल्साससाथ भव्य रुपमा होली पर्व मनाएका छन् । मारवाडी संस्कृति, परम्परा अनुसार ढोलक र विभिन्न बाजागाजासहित खुशीयाली साटासाट गर्दै होली मनाएको मारवाडी सेवा समिति नेपालका अध्यक्ष प्रमोद अग्रवालले जानकारी दिनुभयो ।

मारवाडी युवा मञ्च, मारवाडी सेवा समिति नेपाललगायत मारवाडी समूदायले आयोजना गरेको होली यो समूदायले विशेष चाडको रुपमा लिने गर्दछन् । मारवाडी युवा मञ्चका अध्यक्ष प्रकाश केजरीवालले संस्कृतिको संरक्षण गर्दै एकापसमा खुशी साटासाट गरेर मारवाडी समुदायले होली मनाउने गरेको बताउनुभयो । उहाँले मारवाडी समूदाय आफ्नो संस्कृतिलगायत सबै कुरामा धनि रहेको भन्दै रंगहरुको पर्व होली धूमधामकासाथ मनाएको बताउनुभयो । होलीमा भारतको राजस्थानबाट आएका कलाकारहरुको समूहले होलीलाई रंगिन बनाएका थिए ।

होलीमा मारवाडी समुदायको सांस्कृति र पहिचान झल्कने गीत, संगित र नृत्य प्रस्तुत गरीएको थियो । होली खेल्नेहरु मारवाडी समुदायको पहिरनमा सजिएका थिए । उनीहरुले बर्षेनी होलीलाई भव्य र सभ्य रुपमा मनाउने गरेको मारवाडी सेवा समिति नेपालका महासचिव धर्मेन्द्र अग्रवालले बताउनुभयो ।