शितल निवासमा राष्ट्रपतिबाट ल्होसारको शुभारम्भ

राष्ट्रपति भवन शितल निवासमा ग्याल्पो ल्होसारको अवसरमा एक कार्यक्रम आयोजना गरीएको छ । राष्ट्रपति रामचन्द्र पौडेलले बख्खुमा सजिएर फेम्बर काट्दै आज शेर्पा समूदायका अगुवाहरुसंग ग्याल्पो लोसार मनाउनुभएको हो । राष्ट्रपति पौडेलले २१५२ सिङ मो डुल लो ग्याल्पो लोसारको अवसरमा यसरी शुभकामना आदान प्रदान सहित ल्होसार मनाउनुभएको हो ।
नेपाल शेर्पा संघ र शेर्पा कार्यक्रम आयोजकको संयूक्त आयोजनामा राष्ट्रपति भवन शितल निवासमा आयोजित ग्याल्पो लोसार शुभकामना आदानप्रदान कार्यक्रममा राष्ट्रपति शेर्पा पोशाक बख्खुमा सजिएर फेम्बर (ंविशेष प्रकारको परिकार) काटेर लोसार मनाउनुभएको थियो ।
शेर्पा समुदायको विशिष्ठ व्यक्तिहरुको उपस्थितीमा भएको कार्यक्रममा शेर्पा संस्कृतिमा आधारित श्याब्रु, शिली नृत्य गरिएको थियो । त्यस्तै, शेर्पा कलाकारहरुले शेर्पा भाषामा लोसारका गीतहरु गाएर शेर्पा समुदायको भाषा, संस्कृतिको बारेमा उजागर गरेका थिए ।
कार्यक्रममा बोल्दै राष्ट्रपति पौडेलले ग्याल्पो लोसार जस्ता चाडपर्वले सबै नेपालीवीच आपसी सद्भाव, सहिष्णुता र बन्धुत्वको भाव बृद्धि गर्ने विश्वास व्यक्त गर्नुभयो । राष्ट्रिय एकतालाई थप सुदृढ बनाउँदै आपसी भाइचाराको नाता, राष्ट्रिय एकता समेत प्रगढ बनाउन ग्याल्पो लोसार जस्ता चाडहरुले विशेष भूमिका रहने राष्ट्रपति पौडेलको भनाइ थियो । नेपाल शेर्पा संघका अध्यक्ष गेल्जे लामा शेर्पाले आदिवासी जनजातिहरुको प्रथाजनित कानून, मूल्य मान्यताहरुलाई संस्थागत गर्दै पहिचान, सभ्यतालाई सुृदृढ र संरक्षण गर्नु राज्यको दायित्व रहेकाले यसतर्फ सोच्नुपर्नेमा जोड दिनुभयो । अध्यक्ष शेर्पाले नेपालमा शेर्पा जातिको विशेष पहिचान रहेको र राष्ट्र निर्माणमा शेर्पाहरुले पर्वतीय पर्यटन लगायतको माध्यमबाट खेलेको भूमिकाको राज्यले समयसापेक्ष मूल्याङ्कन गर्दै प्रोत्साहन गर्नुपर्ने बताउनुभयो ।
कार्यक्रममा पूर्वमन्त्री आङ छिरिङ शेर्पा लगायत शेर्पा समुदायका संघसंस्थाका प्रतिनिधि, प्रबुद्ध व्यक्तित्वहरुको उपस्थिती रहेको थियो । शेर्पा समुदायले यस बर्ष
आजदेखि गुथुक र फागुन १६ गते नयाँ बर्षको स्वागत गर्दै भव्यताका साथ ल्होसार मनाउँछन् ।