आज पशुपति गौशाला धर्मशालामा भव्य रुपमा मनाईयो गोपाष्टमी पर्व

आज ८४ औ गोपाष्टमी महोत्सव मनाईएको छ । काठमाडौको पशुपति गौशाला धर्मशालामा आज ८४ औ गोपाष्टमी महोत्सव भव्य रुपमा मनाईएको हो । मारवाडी सेवा समिति नेपाल र पशुपति गौशाला धर्मशालाले महोत्सवको संयुक्त रुपमा आयोजना गरेका हुन् । गौमाता लक्ष्मी अर्थात गाईको संयुक्त पूजा महोत्सवको थालनी ८४ बर्ष अघिदेखि निरन्तर रुपमा गौशाला धर्मशालामा गरीदै आएको पशुपति गौशाला धर्मशालाका अध्यक्ष रमेश तापडियाले जानकारी दिनुभयो ।

मारवाडी सेवा समिति नेपालका अध्यक्ष प्रमोद चौधरी अग्रवालले आज देशभर रहेका १५ वटा गौशाला अर्थात ५ सय बढी गाईको संरक्षण गरी पूजा गरीएको बताउनुभयो । आजका दिनमा गाईको छुट्टै महत्व रहेको र गाईको संरक्षणबाटै सम्पुर्ण मानवको संरक्षण र कल्याण हुने पनि बताउनुभयो । उहाँले धर्मशाला मार्फत अहिले पशुपतिनाथ मन्दिरमा दैनिकरुपमा अभिषेककालागि २९ लिटर दूध पठाईने गरीएको भन्दै गाई भगवानको प्रतिक हुन भन्नुभयो । उहाँले धर्मशाला मार्फत आज पनि शरिरको महत्वपूर्ण अंग खुट्टा गुमाएका ११ जनालाई कृतिम खुट्टा प्रदान गरीएको र अहिले सम्म ६ हजार ७ सयलाई कृतिम खुट्टा बितरण गरी सेवा गरेको जानकारी दिनुभयो । मृगौला रोगिको निःशुल्क डायलसिस गरीएको र प्रत्येक दिन झण्डै ९० जनाको डायलसिस भई रहेको जानकारी दिनुभयो ।
पशुपति बिकास कोषका पूर्व सचिव गोबिन्द टण्डनले बर्षेपिच्छे मनाईने गोपाष्टमी महोत्सवले गाई संरक्षणमा योगदान पुगेको बताउनुभयो । उहाँले मारवाडी समूदायले दैवी प्रकोप बाढी पहिरो, आगलागीजस्ता घटनामा घरबार गुमाएका यस्ता धेरै सामाजिक काम गरी रहेको आफूलाई थाह भएको बताउनुभयो ।
पूर्व कोषाध्यक्ष नरोत्तम वैध, मारवाडी युवा मञ्चा अध्यक्ष प्रकाश केजरीवाललगायतले गोपाष्टमी महोत्सव र समाजमा मारवाडी समूदायले विना स्वार्थ काम गरी रहेको बताउनुभयो । प्रत्येक शनिवार निःशुल्क भोजन, भक्तजनहरुलाई निःशुल्क बस्ने व्यवस्था, निःशुल्क स्नानको व्यवस्था, निःशुल्क शव वहानको व्यवस्था, बेवारीसे शवको व्यवस्थापन लगायतका सेवा पनि मारवाडी समूदायले गर्दे आएको छ । कार्यक्रममा गाई अर्थात गौमाताको पूजाआजा गरी मिष्ठान्न परिकार खान दिइएको थियो ।