मारवाडी सेवा समितिको सहयोग पाउँदा नक्खुका बाढीपीडित खुशी

ललितपुरको नक्खुखोला किनारमा बस्दै आएका बाढीपीडितलाई आज राहतसहितको सहयोग प्रदान गरीएको छ । मारवाडी सेवा समिति नेपाल, मारवाडी युवा मञ्च, मारवाडी महिला मञ्च र श्री पशुपाति गौशाला धर्मशालाले खाद्यान्न, चामल, दाल, नुन, तेल, चिउरा, चिनी, कपडा, कम्बल, मेट्रेस र बालबालिकालाई आवश्यक सामाग्री प्रदान गरेको मारवाडी युवा मञ्चका अध्यक्ष प्रकाश केजरीवालले बताए । गत असोज ११ र १२ गते आएको बाढीले त्यस क्षेत्रका सबै घर डुबानमा परेपछि बाढीपीडितहरु स्थानीय बिद्यालय र आफन्तकोमा आश्रय लिएर बसिरहेकाछन् । बाढीले टीनले बारेका टहरा बस्न नहुने बनाएको छ भने अधिकांशका टहरा बगाएको छ । बाढीले बालबालिका, महिला र ज्येष्ठ नागरिक समस्यामा पर्दे आएकाछन् । बाढीले भएको सबै अन्नपात र लत्ताकपडा बगाएपछि र पुरेपछि आफूहरुको बिचल्नी भएको ङिमा ल्हामु भोटेले बताए । उनीहरु बस्दै आएको ठाउँ बाढीले खण्डहर बनाई दिएको छ । पहिलेको ठाउँमा बस्ने अवस्था नभएको र तत्काल घर टहरा बनाउन पनि सक्ने अवस्था नभएको पीडितहरुले बताएकाछन् । संखुवासभाको भोटखोला गाउँपालिकाबाट ललितपुर–२५ फुलबारीस्थित नक्खु खोला किनारमा बस्दै आएका बाढीपीडित भोटेसमूदायलाई दसैंको मुखमा आएको बाढीले घरबारबिहिन र उठिबास बनाएपछि उनीहरुको दसै पनि यस पटक खल्लो हुने भएको छ । दसैंको मुखमा खाद्यान्न अभाव हुँदा मारवाडी सेवा समितिलगायतले गरेको सहयोगपछि उनीहरु खुशी भएकाछन् ।

मारवाडी सेवा समितिले यस अघि पनि बाढीपीडतलाई खाद्यान्न, लत्ताकपडालगायतका सामाग्री सहयोग गर्दे आएको मारवाडी युवा मञ्चका महासचिव रितेश जाजोदियाले बताए । समितिले सयुक्त रुपमा काभ्रेलगायतका स्थानका बाढीपडितलाई पनि सहयोग गर्दे आएको छ ।