लम्बियो मनसुन, ‘हिले’ दशैं हुन सक्ने

यस वर्षको मनसुन लम्बिने देखिएको छ । मनसुन लम्बिने भएसँगै यस वर्ष हिले दशैं हुने सम्भावना रहेको मौसमविदले बताएका छन् । नेपालमा यो वर्ष मनसुन शुरु हुँदा मौसमविदहरूले सेप्टेम्बर २३ अर्थात् असोज ७ गते मनसुन बाहिरिन सक्ने अनुमान गरेका थिए ।

तर पछि फेरि मौसमविद्हरूले अक्टोबर २ अर्थात् असोज १६ गते मनसुन बाहिरिन सक्ने अनुमान गरे । जल तथा मौसम विज्ञान विभागका मौसमविद् प्रतिभा मानन्धरले यसपालिको मनसुन केही दिन लम्बिने बताएकी छन् । मनसुन सकिने बेलामा बङ्गालको खाडीमा विकसित भएको न्यूनचापीय क्षेत्र उत्तर पश्चिमतिर सर्ने क्रममा भारतको बिहार नजिकै आइपुग्नेछ ।

बिस्तारै मनसुन बाहिरिने भएकाले अक्टोबर २ अर्थात् घटस्थापनाको अघिल्लो दिनसम्म नेपालबाट मनसुन बाहिरिन्छ । त्यस अवधिसम्म झरी लगातार त पर्दैन तर मनसुन पनि नसकिने मौसमविद् प्रतिभा मानन्धरले जानकारी दिइन् । उनका अनुसार अक्टोबर २ को एक हप्तासम्म चाहिँ मनसुन नेपालबाट बाहिरिने छ । घटस्थापनापछि दुई–चार दिन हल्का पानी परे पनि दशैंको टीकाको दिन भने पानी पर्ने सम्भावना नरहेको मौसमविद् मानन्धरले जानकारी दिएकी छन् ।