दार्चुलाको तिंकर सीमानाका सञ्चालनमा

नेपाल र चीनबीचको दार्चुलाको तिंकर सीमानाका साउन ३ गतेदेखि पुनः सञ्चालनमा आएको छ । पहिलो चरणमा असार ११ गतेदेखि खुल्ने भनिएको टिंकर नाका केही प्राविधिक तयारी पूरा नभएको भन्दै चिनिया पक्षले आगामी जुलाई १० अर्थात् असार २६ गतेदेखि खोलिने जानकारी दिएको थियो ।

नाका सञ्चालनको लागि जेठ १७ गते दार्चुला र चीनको ताक्लाकोटस्थित स्थानीय अधिकारीहरुबीच भएको भर्चुअल बैठकमा असार ११ देखि नाका खोल्ने सहमति भएको थियो । चिनिया पक्षले नाका खोल्ने समय सारिएको औपचारिक जानकारी नदिए पनि अनौपचारिक रुपमा स्थानीय दोभासेमार्फत सन्देश पठाएको प्रमुख जिल्ला अधिकारी यज्ञराज जोशीले बताए ।

असार २६ गते पनि सञ्चालनमा आउन नसके पछि साउन ३ गतेदेखि नियमित सञ्चालनमा रहेको प्रशासनले जनाएको छ । नाका सञ्चालनमा आएपछि दर्जन बढी व्यापारीहरू चीनको ताक्ला कोट प्रस्थान गरेको व्यापारी अशोक बोहराले बताए । नेपाली व्यापारीहरू घोडा खच्चर सहित सामान लगेर व्यापारको लागि ताक्ला कोट तिर लागेका हुन् ।

चिनिया सुरक्षाकर्मीले सिमानामा चेकजाँच गरेर मात्र आवतजावतको व्यवस्थापन गरेको व्यापारीहरूले बताएका छन् । नेपालतिर तिंकर र छाङरुमा नेपाल प्रहरी र सशस्त्र प्रहरीले चेकजाँच तथा सुरक्षा दिँदै आएका छन् ।

टिंकर नाका खोल्ने पूर्वतालिकाअनुसार दार्चुलाका प्रजिअसहित सुरक्षा अधिकारीहरुले ताक्ला कोट जाने तयारी गरेका थिए । जिल्लामा रहेका नेपाली सेनाबाहेक सबै सुरक्षा निकायका प्रमुखहरू र सीमा प्रशासन कार्यालयका प्रमुखको टोली असार ९ गते सदरमुकामबाट टिंकर नाकातर्फ जाने तयारी थियो तर असार ८ गते सिमानाका खोल्ने समय १५ दिनपछि सारिएको जानकारी मिलेपछि तत्कालको भ्रमण रोकिएको छ ।

अहिले नाका सञ्चालनमा आएको भए पनि सुरक्षा अधिकारीको टोली तिंकर नाका तर्फ गएको छैन । कोभिड महामारीको समयमा बन्द रहेको नाकामा सुरक्षाकर्मीको बस्ने भवन र पोष्टको संरचनामा यात्रुलाई चेकजाँच गर्ने मेसिन र उपकरण जोड्न बाँकी रहेकोले नाका खोल्न ढिलाइ भएको स्रोतले बताएको छ ।