माधवको सुदूरपश्चिमको निर्णयले सत्ता गठबन्धन तरंगित, ओलीको आक्रोशित टिप्पणी बाधक

एकीकृत समाजवादीले प्रधानमन्त्री पुष्पकमल दाहाल र एमाले अध्यक्ष केपी शर्मा ओलीले पूर्वसहमति तोडेको भन्दै सुदूरपश्चिम प्रदेशमा नयाँ सरकार गठन गर्न विद्रोह गरेपछि गठबन्धनमा गरंगित भएको छ ।

कांग्रेसका मुख्यमन्त्री कमलबहादुर शाहले राजीनामा दिएका थिए । जसका कारण नयाँ सरकार गठन गर्न नेकपा एस कांग्रेस समर्थित नयाँ समीकरणमा सहभागी भएपछि सत्ता गठबन्धनमा तरंग पैदा भएको हो । दाहाल र ओलीले सुदूरपश्चिम प्रदेशको नेतृत्व नेकपा एसलाई दिने सहमति गरेका थिए । तर, उनीहरुले रञ्जिता श्रेष्ठ नेतृत्वको नागरिक उन्मुक्तिलाई दिने अर्को सहमति गरेपछि माधव नेपालले विद्रोह गरेका हुन् । सुदूरपश्चिम प्रदेशको नेतृत्वको विषयलाई लिएर नाउपामै विभाजन पनि आएको छ ।

कांग्रेस, नेकपा एस र राप्रपाको समर्थन जुटाएर नाउपाका रेशम चौधरी निकट लक्ष्मणकिशोर चौधरीले मुख्यमन्त्रीमा दाबी पेस गरी सकेकाछन् । त्यस्तै एमाले र माओवादीको समर्थनमा रञ्जिता पक्षका कैलाश चौधरीले पनि मुख्यमन्त्रीमा दाबी पेस गरेका छन् । गठबन्धनभित्र विवादसँगै नाउपाभित्रबाटै दोहोरो मुख्यमन्त्रीको दाबी प्रस्तुत भएपछि प्रदेश प्रमुख कानूनी परामर्शमा छन् । यद्यपि, नाउपा सुदूरपश्चिममा रेशम पक्षकै बहुमत छ ।

रेशम पक्षका लक्ष्मणकिशोर मुख्यमन्त्री नियुक्त भए त्यसको तरंग केन्द्रसम्म आउने नेताहरुले दाबी गर्न थालेका छन् । तर, सत्ता गठबन्धन मुख्य घटक एमालेका अध्यक्ष ओलीले नेकपा एसले दक्षिणपन्थी अवसरवादी चरित्र नांगो ढंगले प्रकट गरेको भन्दै आक्रोश पोखेका छन् । संसदीय दलको बैठकलाई सम्बोधन गर्दै उनले एस भन्ने पार्टी छ एउटा । हिजोमात्रै प्रधानमन्त्रीको दाबी गर्ने, मुख्यमन्त्रीको दाबी गर्ने कुरा थियो सुदूरपश्चिममा । एकीकृत समाजवादी के नामको पार्टी, त्यसले त्यसप्रकारको अराजनीतिक निर्णय लियो ओलीले भने ।

यतिबेला आन्तरिक रुपमा त्यसमा विपक्षहरुको आशा पलाउने गरी जनतामा आशंका, अन्योल र निराशा केही मात्रामा भए पनि पैदा हुनेगरी त्यस पार्टीले कदम चाल्यो । यस पार्टीको दक्षिणपन्थी अवसरवादी चरित्र धेरै नांगो ढंगले प्रकट भयो । यसैले कुनै फरक पार्नेवाला छैन । यसले केही फरक पार्नेवाला छैन, ओलीले भने ।

ओलीको यो अभिव्यक्तिपछि नेकपा एसका नेताहरु थप बिच्किएका छन् । उपाध्यक्ष तथा संसदीय दलका उपनेता राजेन्द्र पाण्डे, मेटमणि चौधरीलगायतका नेताहरूले गठबन्धनको विकल्प सोच्न अध्यक्ष नेपालमाथि दबाब बढाउन थालिसकेका छन् । ओलीको यो आक्रोशपछि नेकपा एसका केन्द्रीय सदस्य सुदेश पराजुलीले अझै पनि राजनीतिमा अराजकतावाद र असहिष्णुको मुख्य भकारी ओली प्रवृत्ति र ओली नै भएको टिप्पणी गरे ।

उन्ले नेपाली राजनीतिमा झूट, छलछाम, गालीगलोज, आरोप–प्रत्यारोप, विधि पद्धतिको उल्लङ्घन, सहमतिमा धोकाधडीको सुरुवात ओलीबाट नै भएको छ ।’ नेकपा एसका उपाध्यक्ष राजेन्द्र पाण्डेले पनि दाहाल–ओलीले गठबन्धनको जरा काट्न थाले देशभरि समस्या सिर्जना हुनसक्ने चेतावनी दिए ।

सुदूरपश्चिम प्रदेशको नेतृत्व आफूहरुलाई दिने सहमतिबाट दाहाल र ओली ब्याक भएपछि नयाँ ढंगबाट अघि बढेको उनको भनाइ छ । यही समीकरणअनुसार अब अन्य प्रदेशदेखि केन्द्रसम्मै परकम्प आउनसक्छ भन्ने उन्को भनाई थियो । जरा काटेपछि रुखको टुप्पोको पात आफैं सुक्छ । त्यसैले गठबन्धनको जरा काट्न सुदूरबाट सुरू भयो ।