पाकिस्तानी दूतावासले मनायो आफ्नो ८४औँ राष्ट्रिय दिवस

पाकिस्तानले आज आफ्नो ८४ औँ राष्ट्रिय दिवस काठमाडौंमा एक भव्य कार्यक्रमको आयोजना गरी मनाएको छ । उपराष्ट्रपति डा. रामसहायप्रसाद यादवको प्रमुख आतिथ्यमा दूतावासले कार्यक्रम गरेको हो ।

कार्यक्रममा नेपालका लागि पाकिस्तानका राजदूत अबरार एच हाश्मीले सन् १९४० को मार्च २३ को पाकिस्तान प्रस्तावको ऐतिहासिक महत्त्व रहेको बताए । उनले पाकिस्तान निर्माणका लागि लोकतान्त्रिक संघर्ष गरेकोमा कायदे–ए–आजम मुहम्मद अली जिन्नाको नेतृत्वका पुर्खाको योगदानलाई स्मरण पनि गरेका थिए ।

सन् १९६० मा कूटनीतिक सम्बन्ध स्थापना भएयता नेपाल र पाकिस्तानबीच सुमधुर सम्बन्ध रहेको उनको भनाइ थियो । पाकिस्तान र नेपालबीच भौगोलिक, सांस्कृतिकदेखि हिमालयका चुचुरा र प्राकृतिक सम्पदाको समानता रहेकोमा राजदुत हाश्मीले जोड दिए ।

कार्यक्रममा उपप्रधान तथा परराष्ट्रमन्त्री नारायणकाजी श्रेष्ठ, पूर्वप्रधानमन्त्री माधवकुमार नेपाल, प्रतिनिधिसभाकी उपसभामुख इन्दिरा रानामगर, परराष्ट्र सचिव सेवा लम्साल र नेपाली सेनाका पूर्वप्रधानसेनापति समेत उपस्थिति थिए ।

यस्तै, राजनीतिक, नागरिक तथा व्यापारिक अगुवा, निजामती तथा सैनिक अधिकारी, राजदूत, कूटनीतिज्ञ, पाकिस्तानी समुदाय, पत्रकार तथा नागरिक समाजका प्रतिनिधि पनि कार्यक्रममा उपस्थित रहेको दूतावासले जनाएको छ ।