संखुवासभाका लाक्पा शेर्पाले गरे धौलागिरीस्थित पुथा हिमालको सफल अरोहण

प्रख्यात हिमाल आरोहि लाक्पा शेर्पाले अर्को एउटा हिमालको सफल आरोहण गरेकाछन् । शेर्पाले धौलागिरी हिमशृखलाको एक हिस्साको रुपमा रहेको पुथा हिमालको सफल आरोहण गरेका हुन् ।

आरोहणकालागि कठिन मानिएको ७ हजार २ सय ६० मिटर अग्लो हिमाल धौलागिरी हिमशृखलाको पश्चिमी क्षेत्रमा अवस्थित छ । यो पहिलो पटक सन १९५४ मा जेओएम रोबर्ट्स र आङ न्यामा शेर्पाले आरोहण गरेका थिए । उनीसंगै जर्मन टोलीले पनि पुथा हिमालको सफल आरोहण गरेकाछन् । संखुवासभाको मकालु हिमाल आरोहणकालागिसमेत प्रख्यात मानिएका शेर्पाले यस अघि मकालु हिमाल आरोहण गरेर कीर्तिमान कायम गरी सकेकाछन् ।

संखुवासभाको मकालु गाउँपालिकाका युवा पर्वतारोही शेर्पाले हिमाल आरोहणमा छुट्टै पहिचान बनाएकाछन् । यो हिमचूलीको आरोहणसंगै शेर्पा अन्य हिमालको आरोहणको तयारी पनि गरेकाछन् । बिग्रदो मौसमका बाबजुद पनि शेर्पा र जर्मन टोलीले उक्त हिमाल आरोहण गरेको हो ।