चन्द्रागिरिबाट प्याराग्लाइडिङ उडान, चित्लाङमा अवतरण

काठमाडौं उपत्यकाको एक व्यस्त ‘हिल स्टेसन’ चन्द्रागिरिबाट अब प्याराग्लाइडिङको व्यावसायिक उडान सुरू भएको छ । बाबु एड्भेन्चर्सले चन्द्रागिरिबाट उडान गरी मकवानपुरको चित्लाङमा अवतरण गर्न सकिने गरी प्याराग्लाइडिङ सञ्चालनमा ल्याएको हो ।

हाइ अल्टिच्युड प्याराग्लाइडिङका लागि नेपालका पहिलो प्रशिक्षक पाइलट सानोबाबु सुनुवारले यो कम्पनीमार्फत व्यवसायी उडान थालेका हुन् । सुनुवार नेसनल जियोग्राफ्रीबाट ‘एडभेन्चर्स अफ इयर–२०१२’ अवार्ड विजेता हुन् ।

भालेश्वर मन्दिरबाट २० मिनेट पश्चिमतर्फको चन्द्रागिरि डाँडाबाट प्याराग्लाइडिङ उडान सुरू हुने गरी माथिल्लो स्टेसन तोकिएको छ । चन्द्रागिरि (२३ सय मिटर)बाट सुरू भएको उडान त्यहाँबाट आकाशमा सय मिटरसम्म उचाइ लिने कम्पनीले जनाएको छ । त्यसपछि १७ सय मिटर उचाइ रहेको चित्लाङमा प्याराग्लाइडिङको अवतरण गरिन्छ ।

प्याराग्लाइडिङ उडानका क्रममा भालेश्वर मन्दिरको ‘एरियल भ्यू’का साथै काठमाडौं उपत्यकाको अधिकांश भू–भागको अवलोकन गर्न सकिने कम्पनीले जनाएको छ । उडानका दौरान रसुवा र धादिङका भू–भाग समेत देख्न पाइन्छ । उडानबाट मकवानपुरको टिस्टुङ, पालुङ लगायत मानव निर्मित इन्द्रसरोवर तालको समेत आकर्षक दृश्यावलोकन गर्न सकिने बताइएको छ । मौसम खुलेको बेला उत्तरतर्फ फराकिलो हिमश्रृङ्खला देखिन्छ ।

उडानको अधिकांश समय जंगलमाथि हुने गर्छ । कम्पनीले एकैपटकमा १२ प्याराग्लाइडर उडाउन सक्ने गरी अनुमति लिएको छ । दिनमा करिब सय जनासम्मलाई सेवा दिन सकिने सञ्चालक सुनुवारले बताए । स्याङ्जाको स्वरेक मैदानमा प्याराग्लाइडिङ स्कुल सञ्चालन गरिरहेका सुनुवार साहसिक हवाई पर्यटन नेपालभर सम्भव भएको र काठमाडौंमा उपत्यकाबासीलाई पनि प्यारा उडानको स्वाद चखाउन चन्द्रागिरिमा लगानी गरेको बताउँछन् ।

चन्द्रागिरिमा प्याराग्लाइडिङ सञ्चालन गर्न डेढ करोड लगानी गरेको र अझै लगानी थप्ने योजना रहेको उनले बताए । अनुसन्धान, कागजी प्रक्रिया र भौतिक तयारी गरी करिब ६ वर्षको प्रयासमा चन्द्रागिरिमा प्याराग्लाइडिङ सुरू गरिएको उनले बताए ।