दसैंमा सुनसान भयो काठमाडौं उपत्यका

नेपालीहरुको महान् पर्व विजयादशमी (बडादसैँ) मनाउन उपत्यकामा कामविशेषले बसोबास गर्दैआएका आम सर्वसाधारण शहरबाट गाउँ फर्किएसँगै काठमाडौं सुनसान भएको छ ।

बडादसैँ तथा तिहार मनाउन सर्वसाधारणहरु गाउँ फर्किएको र काठमाडौंका स्थानीयवासीहरु घरबाहिर ननिस्किँदा काठमाडौं सुनसान भएको हो ।

आज महानवमीको दिन केही मात्रामा मात्रै सर्वसाधारणहरु सडकमा देखिएका छन् । सधैँजसो ट्राफिक जामले भरिने काठमाडौं उपत्यकाका सडक अहिले मानिसको आवतजावत घटेपछि सुनसान भएका छन् । सडकमा हिँड्डुल गर्ने मानिस र सवारीसाधन फाट्टफुट्ट मात्रै देखिएका छन् । किनमेलका पसलहरु अधिकांश बन्द छन् ।

काठमाडौंमा मानिसहरुको खचाखच हुने न्युरोड, एनएसी, भद्रकालीलगायतका ठाउँहरुमा पसलहरु बन्द छन् । दसैँमा हुनसक्ने सम्भावित दुर्घटनालाई न्यूनीकरण गर्न भन्दै महानगरीय ट्राफिक प्रहरी महाशाखाले ठाउँ–ठाउँमा चेकिङ गरिरहेको छ ।